يارب قوينى على نفسى

نفسى اتكلم وافضفض بس عارفه انى لو اتكلمت ممكن حد قريب منى هيزعل من كلامى بس احساس غصب عنى ساعات بحس ان الظروف ضدى او احساس الفرحه لا يدوم معايا بيدوب بسرعه بحمد ربنا وبقول الحمد لله بس مش عارفه حاسه ان حياتى ترتيبها غلط حياة كدة مش مستقرة مش عارفه هوا انا يا ترى اللى عملت فى نفسى كدة ولا هوا ربنا مكتوب عليا كدة عادى يعنى لا اعترض على حكمه بس الانسان بشر

ساعات بحس وبسال نفسى يا ترى اشمعنى انا اللى كدة بس بستغفر ربنا واقول ياااااااااااه احسن من غيرنا بكتييييييييييييييير فيه غيرنا ظروفهم اصعب

كنت طول عمرى بحلم بحياة هادية بعيدة عن المشاكل ليها جو معين اكون مميزة فى شكل بيتى فى حياتى مش بحب الملل عشان بزهق بسرعه بحب التجديد نوعا ما بس مش فى كل الحاجات ودايما كنت بتخيل الراجل اللى ارتبط بيه مش اى حد والحمد لله

بس دايما لازم كل حاجة تبقى ملخبطه ومهما ترتب نفسك على حاجة تلاقى حاجات تانية خالص ممكن تبقى مش عايزها بس مجبر عليها لأنها الظروف كدة

ممكن ميكونش حد فاهم حاجة مش مهم

انا عايزة اتكلم اخرج اللى جوايا لأن ساعات بحس انى كبرت اووووووووووى ومهمومه اوى من جوايا بفكر كتير مش بعرف انام كويس بليل مش باكل بنفس ولا كويس زى الاول حاسه انى فى حاله هذيان

بحلم بحاجات كتييييييييييير اوووووووووووى احققها بس بقول يا ترى هشوفها تتحق يا ترى

بقول لنفسى الله اعلم او يمكن مكتوب عليا حاجة معينه اشوفها وبس

دايما كنت بقول لاصحابى فيه شخص مكتوب عليه ومكتوب علينا كلنا اننا لازم نتحمل اقدارنا فى صمت

ونقول الحمد لله

ساعات لما تلاقى كل الناس مركزة وياك او شايفاك حاجة واو

وانت من جواك ولا شايف كدة ولا يحزنون

بس مجرد بتحب الناس بحب فى ربنا

تتمنى الخير للناس كلها متبقاش لوحدك مبسوط لأ تبقى كل الناس مبسوطه

ساعات اصحابى بيقولولى معادله صعبه

بس مش بعيدة على ربنا

المهم

انى بدأت اخاف

اخاف من نفسى واحيانا بدأت اخاف من الناس

مش عارفه انا بخرف بس المجمل انى مش عاجبنى نفسى

وبقول يا رب ساعدنى انى اساعد نفسى وقوينى عليها