الحب لحن جميل

الحياة جواها فوايد وتعاليم

سلامو عليكم

بيقولوا فى حكمه العقلاء الدنيا مدرسه والمدرسه بتاعتها واسعه اووووووووووووى نتعلم منها كل شئ واى شئ

تعرفوا من كام يوم كنت واقفة على محطه الاتوبيس كنت مستنيه مواصله تنقلنى للمكان اللى عايزة اروحه فا لقيت من

قدامى اتوبيس عدى وموقفش فى المحطه يمكن هدى بعد المحطه بشوية وطبعا الواقف المسلوخ فى الشمس مش هيقول يلا مش مشكلة لأ طبعا هيجيب ديل الجلبيه فى سنانه ويجرى عليه وده اللى حصل بجد الراجل صعب عليا

اووووووووووى

وبعدين قعدت افكر شوية وقلت ايه نط فى دماغى موضوع قديم كنت بتناقش فيه ويا زمايلى ايام شغلى القديم وبما اننا

كنا من هوايات الجرى ورا الاتوبيس والماسكه فى العمود لحسن نطير وخلافه بقى ايام كانت كفاح وجميلة بصحيح المهم

كنت دايما من انصار ان ركوب المواصلات العامه فيها فلسفه جامدة اووووووووى

اول حاجة من الناحيه الاجتماعيه انك بتحس بالناس اللى حواليك وبتشعر بيهم وبتلاقى مواقف كتير بتقابلك وممكن كمان

من حديث ناس انت راكب وياهم تستفيد منه او يخفف عنك هم لأن همهم اعظم من همك فبالتلى هتفكر فى الحوار

وهتعرف ان ربنا رؤوف بيك وان الحمد لله انت احسن من غيرك برضو

تانى حاجة انه بيعلمنا الصبر لما بنيجى نركب الاتوبيس زحمه شوية الزحمه المقبولة اننا واقفين مرتاحين بتشوف الدنيا

وبعدين بتبقى واقف محتمل لحد مااااااااااااا ايه تلاقى حد ييقوم بقى ويكون شهم او الاتوبيس او المينى باص او المترو

يروق وتلاقى مكان وتقعد وبالتالى انك محصلتش على الحاجة بسهولة

تالت حاجة انه بيخليك تتامل فى وجوه البشر اللى حواليك وتلاقى الانيق والغلبان والفقير واللى بيدعى الفقر واللى

بيشحت كل واحد لو قعدت تتامل فيه شويه هتفهم الدنيا اللى حواليك والناس وفعلا الناس بقت غريبه اووووووووووى

ده ناهيك عن البنات وكلامهم وبقوا بيفكروا ازاى وبقول البنات عشان انا فى المترو مش بركب غير فى عربيه السيدات

اما الاتوبيس وكدة وخلافه البنات فيه بتتلم شوية او يمكن بيكون فيه مرقعه بس على خفيف

رابعا ممكن حد يطلب منك المساعدة انك تشيل وياه حاجة تقيله او تعديه سلم او خلافه وساعتها بتاخد ثواب عظيم

خامسا بقى لقيت ان كمان لما بتيجى تركب الاتوبيس وتجرى وراه اديك عملت رياضه ولا بقى تقولى تروح لجيم وتدفع

آد كدة ولا يحزنون رياضه ببلاش اهو رياضه الناس الغلابه الشقيانه اللى كل يوم متبهدله فى المواصلات

سادسا انك متحسش انك مرتاح على طول وبتشارك الناس مش عشان ربنا كرمك وتقدر تركب عربيه او غيره مواصله

مريحه تنسى بقى لأ انت بتشارك الناس وعشان تحس ان الحياة فيها كدة وكدة

آخر حاجة والحاجة اللى مفروض تتم وللاسف اختفت دلوقت لما تلاقى حد كبير اكبر منك او تعبان والدنيا زحمه وعايز

يقعد بتقوم سواء بقى امرأة او راجل عجوز او سيدة حامل او حامله لطفل وهكذا

وده بيخلى فيه تراحم بين الناس وبعضها

وللاسف الناس دلوقت بقت بتطنش والاطفال آباهم وامهاتهم بيعلموهم دلوقت التلامه ويقعدوا براحتهم على الكنبه ولا

الكرسى ومش مشكلة اللى واقف يولع ولو كان عاجبه

معلش يمكن يكون الكلام غريب بس هوا ده العادى بتاعى

هاههههههههههههههههههه

ما احنا اتفقنا خدوا الحكمه من افواه المجانين

........................................

امبارح كنت راكبه المترو كنت رايحه اجيب الحاجات وكدة عشان بنحضر لمفاجأة اميرة اللذيذة فى عيد ميلادها مش هنقول الكام عشان منحرجهاش بس

انا وايمان وندا كنا عاملين تخطيط والحمد لله تم بحمد الله والكل انبسط وقضينا وقت جميييييييييييل اوووووووووووووووى

وانا راكبه وواقفه بستعد لنزول المحطه اللى جاية لقيت راجل عجوز بس انتيكه اوووووى لقيته واقف باصص فى الساعه وزى ما يكون تعبيره مندهش اوووووووووووى

وبعدين سالنى هيا الساعه تلاته ولا اربعه

قولتلو اربعه

قالى ليه

ونظام بسرعه بقى الباب كان هيقفل وكنت حاسه انه هيجراله حاجة

هيغروها اربعه ليه

قولتو عشان حضرتك الساعه اتغيرت امبارح التوقيت الصيفى بقى

بصراحه بقى الموضوع ملخبط اووووووووووى

وبقت الناس مش فاهمه حاجة

انا عن نفسى مكنتش اعرف ان الساعه اتغيرت الا تانى يوم لما بابا وماما قالولى ومكنتش مصدقاهم والساعات حواليا بنفس التوقيت القديم

الله مش كانت آخر خميس فى ابريل نقدم الساعه وآخر خميس فى سبتمبر ناخرها

بس الظاهر لما السنه اللى فاتت جه رمضان فى سبتمبر وقالوا نرجع التوقيت الشتوى عشان رفقه بالصائمين وكدة وكمان كان التاخير قبل الميعاد المعتاد ليه فا بالتالى اترتب عليه انهم يقدموا كمان اليوم اللى نقدم فيه الساعه

بس هوا سؤال بيطرح نفسه هوا احنا ليه بنقدمها ولا بناخرها ليه منثبتش على توقيت واحد حتى يكون اريح للناس بدل ما بيحصل لخبطه

هما ليه بقى قدموا الساعه

ها

ليييييييييييييييييييييييييييييييييييييه

هاهههههههههههههههههههههههههههههههههههههه

نترك الاجابه للساده الافاضل

اللى هيدلو برايهم

ونترككم الان ولنعود بعد الفاصل

ما احلى الجنون فيه

مساء الخير عليكم جمعيا

انا عارفه انى بقيت رخمه وبتاخر كتير بس اعمل ايه دايما اركب توتوك يوصلنى لحد هنا وافضل زى التايه جوايا حاجات اعملها واقولها لكن مش عارفه اقول حاجة جوايا حاجات كتيييييييييييييير اووووووووووى بكون عايزة احكى عنها بس ياما بكون كسلانه او مرهقه او لاسباب نفسيه تانية المهم انى من كام يوم بالتحديد يوم الاربع اليوم كان بدايته عادى بس انتهى فى الاخر بتهييس جامد اووووووى عارفين لما يكون الواحد بيحس بحاله من الجنون بيضحك اوووووووى وبيهييس بقى بقيت اهيس مع العملا واضحك وبعمل حاجات غريبه واصحابى معايا بيضحكوا معايا

هاههههههههههههههههههههه حاله بعيشها كدة ويا نفسى امتى بالتحديد بتيجى الله اعلم بس لازم تيجى عشان احس انى بعمل حاجة نفسى اعملها وان جيتو للحق انا اصلا مجنونه بيكون نفسى اعمل حاجات مجنونه كتييييييير اووووووووى بس بحجم نفسى وساعات مش بقدر فا بتلسع بحب اعيش الحياة كدة عادى بتلقائيه ومرح زى ما خلقنا ربنا

المهم ندا صاحبتى اتصلت بيا وقالتلى نتقابل وكدة انا وانتى وايمان وبما ان مواعيدى فى الشغل دلوقت صعبه وبقينا عبيد فى الشغل هاههههههههههه بقيت طبيعى جدا مش بعرف اعمل اى حاجة بعد مواعيد الشغل اللى مبقاش فيها ليها مواعيد حسيت انى محتاجة اشوفهم مع اننا لسه شايفاهم قريب يعنى لكن مش عارفه حسيت ان الخروجة مكنتش متظبطه اوى وراجعين بيوتنا عادى مش عارفه ليه واللى كان مضايق واللى كان سرحان واللى واللى فا حسيت انهم واحشنى اوووووووى طب والشغل بصراحه قولت لندا انى مش اكيد هقدر آجى بس لو عرفت هتصل بيكى واقولك عشان تستنونى عشان هتاخر عليكو شوية مش هعرف اتقابل فى نفس ميعادكو بس بعد ما قفلت خلاص ركبت فى دماغى انى هشوفهم ويولع بقى الشغل على التحديث على اى حاجة المهم اننا نستنشق هواء نقى نشوف مناظر طبيعية اشوف بنآدمين اشوف اخواتى فى الله كدة يعنى

المهم اخدت العزم وعلى تمام الساعه خلاص لميت حاجتى واتوكلت على الله اللى قلقنى بس موضوع المينى باص اللى على طول بنطلطع كتير عقبال ما يجى المهم الحمد لله ركبت وطمنتهم انى فى السكه وشفتهم وقعدنا ويا بعض ومستمرين فى نظام التهييس

بس كان يوم تحووووووووووووفة وايمان حبيبتى غنت وعرفتنا على بنت عسولة اسمها مصريه رقيقه اووووووى وصوتها جميييييييييييل يااااااااااااااااه انا عارفه المواهب دية مش بتعبى شريط ليه ولا لازم يصدعونا ويسودوا عيشتنا بببحبك يا حمار .........هاههههههههههههه يلا الغرض قعدت احكيلهم عملت ايه ويا العملا والمواقف المضحكه اللى حصلت وقعدنا نضحك ويا بعضنا وكدةبس لفت نظرى حاجة جميله اوووووووووى كان فيه قطه جت وقعدت على الكنبه اللى احنا قاعدين عليها كانت بتعمل حركات غريبه اوووووى وحتى التنفس بيتاعها غريب مقدرتش امسك نفسى قلت لازم اصورها واصورها فيديو كمان بس للاسف اللقطه اللى بكون عايزاها بتبقى عدتنى

القطه نايمه فى سكون بس مفتحه عنيها وبتحاول ترفع راسها لفوق وبتنفس وبتبص على الناس يااااااااه اتهيئلى انها كانها بتقول عايزة استنشق هواء نضيف بقى وكان لسان حالها بيقول وهيا بتبص للناس مستغرباها ايه كل الناس دية ومالهم عاملين كدة ليه وايه اللبس الغريب ده يعنى اتخيلت كدة

وبعدين فضلت عنيها تنعس حبه بحبه لحد ما غمضتت ياااااااااااااااااااه كاااااااااااااااانت صورة بديعه بجد الواحد يقول فى سره لمخلوقات ربنا دية لما يشوف ويتابع حركاتها يا سبحان الله

وكان الطير فعلا يسبح بحمد ربنا ودية حقيقه وانا شوفتها بعنيا مرة كنت نازلة فى صلاه عيد وشفت القطه واقفة على عتبه الباب بتاع العمارة وبتسمع الاذان وودنها بتهتز وواقفة فى سكون عجيب بجد استغربت اوووووى ساعتها ياااااااااااااااااااااااااااه آآآآآآآآآآآآآيه من الجمال

بجد بجد اللى بيتامل فى مخلوفات الطبيعه بيحس بآد ايه جمال عظمه خالقنا وحكمته وسبحانه

المهم محسناش بالوقت هووووووووب كلنا نطينا بس كان نفسى نعدى على معرض كدة لمحته بره وانا داخله بس قلت بعدين بقى ابقى اعرف ايه دهلما اقابل اخواتى فى الله

المهم وقفنا واتفرجنا كان معرض لبنت فنانه بتعمل مشغولات اكسسوار حاجات هيا بتعملها وحاجات بتسوقها بس بجد عجبنى جدااااا وعجبنا كلنا وخصوصا انه اسعاره رخيصه وزوقه حلو اوووووووووى تبقى مش عارف تجيب ايه ولا ايه وانا عموما بحب الاكسسوار بحس انه بيضفى نوع من البهجه والتجديد وبما انى كنت فى نفس الحاله اياها فا جبت شوية كنت مبسوطه بقى وكمان بحب اشجع اوى اصحاب المواهب فا جبت حاجة البنت عملاها رقيقه اوووووى زيها وحاجات تانية هيا بتسوقها وكمان عجبنى مبدئ البنت اووووووى وعلى فكرة المعرض مستمر فى الساقيه لحد يوم 19 للى يحب يروح ياخد فكرة حتى

المهم وانا مروحه خلاص حددت انا هلبس الوان ايه وانا ريحه الشغل بكرة وهلبس عليه العقد الجديد اللى لسه جايباه وانطلقنا جرى على بيتنا وانبسطنا اووووووووى لدرجة انى كنت بضحك وانا فى المترو من جوا ومقدرتش امسك نفسى الا لما نزلت رحت مكلمه ايمان وعمالة احكيلها على حاجات بعلق عليها وكدة وانا مسخسخه هو خلاص بقى الحاله جت

المهم صليت وكويت هدومى جيت عند الايشارب بقى طب ايه بقى وبعدين الافضل احطه على شماعه بقى احسن عشان ميتكسرش لو علقته فى الشماعه اللى ورا الباب هيتكسر بلاش المهم قعدت ادور على شماعه والدنيا ليل وبابا وماما نامو مفيش فى دولابنا فا قلت ادعبس بشويش فى اوضه بابا وماما طلعت بشماعه كدة ولما خرجت وبعد ما علقت الهدوم عليها كنت معتقدة انها تنفع ومستكمله عادى التعليق وهيا اصلا من فوق الدايرة بتاعتها نصها مكسور يعنى مش هتعرف تتعلق طب اعمل ايه اعمل ايه وكسلت بقى اجيب واحدة تانية خلاص ركبت معايا انى هعلقها على دية قلت ادور على حته قماشه شريطه اربطها فى الشماعه واعلقها على ورا الباب وبعدين قلت طب ما اربط الحزام واعلقها هاهههههههههههههههههههههه وفعلا قد كان عملت كدة وانا طايرة من الانبساط واخدت دش عشان العملية تكمل وصليت لربنا وحمدته وشكرته ودعيت لاخواتى وشوف بقى يا اخى التهييس كنت هكتب لندا رساله بليل قبل ما انام وبعدين خلاص عنيا بتقفل قلت زمانها هيا كمان نامت المهم بعد ما نمت صحيت على رسالتها الساعه 3 الصبح هاههههههههههههههههههه مش بقولكو شله مجانين احنا وانا كمان رحت رده عليها

وقلت ياااااااااه ده اللى بقكر فيه نفس اللى بتفكر فيه هاهههههههههههههههههههههههههههههه ربنا ما يحرمنا من الجنان والحب ابدا

بس للاسف بقى الموضوع مش على طول بقى يبقى كدة وتكمل الدنيا وتبقى سعادة على طول

تانى يوم صحيت حاسه بحاجه حاسه ان فيه حاجة غريبه كانى كنت امبارح انسانه ولمما صحيت الصبح كنت انسانه تانية قلت خير وحاسه ان فيه حاجة غريبه وقد كان وصلت للشغل

واتصدمت بحاله الزوبعه العظمى كان المدير كان فى حاله هياج اول مرة نشوفها كلنا يلا منه لله بقى اللى كان السبب فى كدة وراسه والف سيف اننا هننزل شغل جمعه وسبت وموت بقى فى الشغل وبتاع وفيها حبس للى مش هينزل هاهههههههههههههههههههه وانا عمالة اقول فى سرى يا دهوتى لأن موعدا ناس على رحله يوم الجمعه طب ايه

مش عارفه جالى حاله كدة من السكون والقلق والتكفير والاكتئاب عشان برضو يوم الاجازة ده الوحد بيستناه بفارغ الصبر عشان يتحرر ويعمل اللى هوا عايزه لأن بتخنق لما بلاقى حد بيسلب حريتى على غير رغبتى او ارادتى بتعب نفسيا اوووووى اه بتعود وكدة بس كل حاجة ليها حدود ايام الشغل هنسهر وكدة ماشى لكن فى يوم الاجازة كمان صعب اوى كدة العملية ده غير انى فعلا محتاجه لتغيير جو

المهم الحمد لله ربنا سهلها من عنده وطلعت الرحله ويا اخواتى فى ربنا وكان وقت ممتع جدااااااااااااااااااااااااااااا اكتر من المرة اللى فاتت وحسيت انى انبسطت اوى وانبسطنا كلنا سوا وكان نفسى نبقى هناك ياااااااااااه منظر الورد والميه والخضرة والسما يااااااااااااااااااااااااه جمييييييييييييييييييييييييييييييييييييييل والحمد لله وشى معرفتش نفسى فى المرايه عفريته عشان قعدنا فى الشمس وتانى يوم نزلت الشغل بروح تانية متجددة وسهرت فى الشغل بس كالعادة بقى كعادة الدنيا يعنى يوم حلو ويوم مر

حاسه بروح هدوء كدة سكون مش عارفه مقدرش اقول عليها اكتئاب بس لما تكون حاسس انك شغال فى ساقيه بتتضايق وكمان لما تحاول تنشل نفسك من حاجة تقع فى حاجة تانية ملهاش نهاية بقى هتعمل ايه هتضايق

وكمان بحس الدينا مش مستاهله لحظه الم او حزن او نكد

حلوة الحياة لما نعيشها كدة زى ما هيا على راى محمد منير

هاههههههههههههههههههههههههههههه

بس النهارده كان يوم يدعو فعلا للسكينه

رئيسه القسم عندى طلبت منى كشف حساب لواحد مات ببص للاسم انا عرافه الشخص صاحب الحساب ده اتاثرت اووووووى بموته وافتكرته لما كان بيجى ويسال على حسابه والمعاش دخل ولا لأ وافتكرت اول لقاء بينا لما جه الصبح بدرى اووووى وطلب كشف حساب عشان يورى مراته وولاده انه ده اللى قبضه وان معاشه زاد بملغ كذا بس مش اكتر الكلام ده وقت الزيادات ولخبطه الناس وقعد يحكيلى انهم بيتهجموا عليه وبيضربوه وكدة وقعد يعيط ويترجانى انى اكتبله ورقه او اجيبله ورقه من البنك

بس بجد اول مرة كان قدامى وهوا بيحكى ولسه بقى ساعه صبح مقدرتش امسك نفسى دموعى نزلت قدامه وهوا قعد يعتذر انه نكد عليا وكدة يلا هنعمل ايه بقى هيا الحياة كدة برضو

المهم السؤال اللى جه ف بالى يا ترى عم فريد مات موته ربنا ولا من كتر الضغوط عليه من مراته وولاده مات مثلا متاثر ولا ايه بالظبط

بس على كل الاحوال ربنا رحمه

واتمنى انه ربنا يجعل مثواه الجنه جزاء صبره على الظروف اللى كان فيها ويهدى اهله ويصبرهم لو هما زعلانين عليه

مش عارفه ليه غصب عنى ساعات بقف عند حاجات غريبه او عجيبه واقف عندها افكر فيها وممكن اتاثر بيها واقعد اتعب نفسى فيها وفى الاخر بقول خلاص

لله الامر من قبل ومن بعد وربنا يصلح حالنا اجمعين

عادى بقى مهو الجنان جنان برضو

هاههههههههههههههههههههههههههههههههههههههههههههه

والجنان نعمه على فكرة ربنا ما يحرمكو منها ابداااااااااااااااااا

عارفين ليه عشان تبقى منطلق وتبقى على طبيعتك ووقت ما انت عايز تعمل حاجة اعملها ومحدش هيلومك عشان هيقولوا عليك

اممممممما مجنون صحيح

يا مجنون

هاههههههههههههههههههههههههههههههههههههههههههههههههههههههههههههههههههههههههههه

والمجانين فى نعبم يا جماعه

عيش مجنون ترى الوجود جميلا

دية حكمه العقلاء.........اقصد المجانين

يلا سلاموز والى اللقاء قريبا عشان لسه الكلام مخلصش

هيا الحياة كدة

سلامو عليكم

بقالى كتير مكبتبش حاجة هنا

مش عارفه ليه

يمكن عشان الوقت يمكن عشان ذهنى مش صافى ................ يمكن.....جايز كل شئ بقى جايز دلوقت

كنت زمان باجى وافضفض هنا حتى لما بشوف مواقف اثرت فيا بكتبها هنا اخرجها هنا عشان دية مساحتى الخاصه اعبر فيها كيفما اشاء وكيفما اريد

وبعدين بدأ الموضوع يقل شوية بشوية لما اتغيرت ظروف شغلى ووقتى انشغل اكتر وومساحه الوقت فيه بدأت تقل

حتى انشطتى الاجتماعية بدأت تقل شوية بشوية لحد ما تكاد تكون تنعدم

وللاسف كل ده بيسيب تأثير جوايا وبيتحوش شوية بشوية لحد ما تحصل حاجة الواحد يبص على اللى بيحصل هوا فيه ايه او ايه اللى حصل

حتى اغلب الناس المعتاد فى اول السنه الجديدة بينزلوا بوست

وكل واحد بيكتب تمنياته ايه وبيحاول يكون متفاءل لو تعبان من جواه ولو كويس ربنا يكرمه بقى

ويسعد ايامه

لكن حسيت انى بلاش اكون تقليدية وبدل ما انزله فى اول يوم من السنه اكتبه فى آخر يوم فى الشهر من بدايه السنه اهو تغيير بقى واكتب انطباعى عنه ايه .......حاجة من الواقع زى ما بيقولوا

وللاسف اول يوم ده كان مأساه عندى فى الشغل الناس بقت غريبه والتسامح والتراحم بقى بين الناس وبعضها بقى ضعيف جداااااا للاسف وده شئ بيضايق

عشان كدة الناس بقت اعصابها تعبانه لاقل حاجة واتفه حاجة

ضغوط الحياة بقت كتيرة وبقى عبء عليهم

يا ترى يومهم هيعملوا ايه فيه

حتى الناس بقت حياتها صعبه

فى مرة من المرات واقفه عند محل الصبح بشترى قلم للكتابه وفيه اطفال كتير واقفين عند المحل ومستينه الاطفال الصغيرين يخلصوا وادخل انا بعدهم وخصوصا ان الست اللى واقفه فى المحل ست كبيرة اوى من دور جدتى

المهم بنت شاكلها من المدارس اللغات اللى عند مكان شغلى اللى حواليا ووالدتها وياها وبتشترى حاجات كتير وكدة شيبسى وشيكولاته وكانز

واطفال تانيه جنبها

فى حين ان كان فيه بنت واقفه على الطرف ماسكه ربع جنيه فى ايديها وعماله تبصله وتبص للحاجات اللى بتطلع

وبتسال نفسها يا ترى ده هشترى بيه ايه

فضلت تسال الست ده بكام وده بكام لحد ما جابت الحاجة اللى تناسب الفلوس اللى وياها

ياااااااااه لسه الربع جنيه بيجب حاجة

والله لسه الدنيا بخير

طبعا دية حاله الله اعلم فيه منها كام حاله

والبنت دية حياتها عايشه ازاى اصلا

طبعا شئ موسف للغايه

كل يوم اعدى الصبح الاقى ست بتمد ايدها على ناصيه الشارع وتدعيلك

عشان تمد ايدك فى جيبك وتديها

لكن انا بمشى لأنى مش مقتنعه باللى بتعمله ومفيش جوايا اى مشاعر حساها من ناحيتها حاسه انها بتمثل

بحس انها بتتصنع طبعا مجرد انك تكمل مشيك وتدى ضهرك خلاص الدعوة تتقلب

هاههههههههههههههه

عالم غريب

وللاسف الاطفال بقوا منتشرين اوى فى الحكايات دية حتى جوا عربيات المترو

شئ بقى مؤسف للغاية

فى حين ان ست دخلت عندى فى مقر عملى وعنيها زايغه وزى ما تكون مكسوفة تقول حاجة او تسال على حاجة وقفت فى النص وحواليها المكاتب سالتها محتاجه حاجة او تسالى على حاجة قالتلى سلامتك

وقالت بكسوف عن طلبها كانت جايه تقبض معاشها وللاسف معاشها لسه منزلش

ومش معاها مواصلات

محتاجه مجرد جنيه عشان تركب

وبجد كانت اول واحدة اشوف ست بتطلب على استحياء كدة حتى فى ردها

بطيبه وسذاجه

وسئلت نفسى بعد ما مشيت يا ترى ممكن بقى لما تلاقى الناس اتعاطفت وياها

تستغل الفرصة وتبقى زى غيرها

شئ غريب

لو فكرنا فى افكارنا من جوانا هنحس ان مبقاش فيه امان

حتى فى اقرب الناس ليك اللى كانوا بالنسبه ليك كل حاجة وانت بالنسبه ليهم كل حاجة

من كتر الثقه المتبادله لما بيحصل دروب بتبقى من جواك زى ما تكون فيه ضلع انكسر جواك وبقول ضلع من متانه العلاقه

لما اللى قدامك بيقول كلام مكنتش تتوقعه او متحسش انه يكون من جواه كدة

تخاف من جواك

وتخاف اكتر واكتر

وتخاف من بكرة وتخاف من كل حاجة

حتى اليوم اللى بستناه بفارغ الصبر عشان بعده يكون اجازة بقيت اخاف منه

وللاسف عشان تحاول تصلح الانكسار بتحاول تلحمه عشان ترجعه تانى بتحاول من جواك وانت بتبكى ومش عارف تعمل ايه

سايب الاحوال والامور لربنا وسايبها للايام يمكن تداويها

بيكون نفسك تقول كلام كتير حلو من جواك حاسس بيه

بس مش عارف تقوله زى الاول

مبقتش عارف تتكلم او تعبر

حاجو بترجعك وتفكرك بمواقف وحاجات قبل كدة وكلام متحبش تفتكره ومواقف

واقول يا ربى كان علينا بايه ده كله

وليه الانسان بيحب يعذب نفسه بحاجات قديمه فاتت وعدت ومن وجهه نظره بيبصلها من غير ما يشوف وجهه نظر اللى حواليه

ليه بقينا سهل نظلم بعضنا ونجرح بعضنا

ليييييييييييييييييييييييييييييييه

ميت علامه استفهام

الدنيا بقى فيها ضغوط كفايه ليه منكونش بنصبر نفسنا عليها ونعين بعضنا عليها

ويمكن الصورة اللى بتكون فى ذهن الناس التانية مش عارفه اعبر عنها انها غلط لأنها فعلا غلط وعكسها تماما

بس عشان احنا من جوانا النفس بتقول ليه منقارنش واشمعنى فلان وعلان ودخلنا فى دايرة الشيطان وسبنا نفسنا ليه يدخل ما بينا

ليه نسيبه يستغل الفرصه ويكسر حاجة حلوة جوانا بنعيش بيها وبنعيش غيرنا فيها

اصبحت مرايه فيها صورتين صورة قدام الناس تضحك ومبتسم وتسعد غيرك دايما وتشارك الناس وتعيش حياتك عادى

وصورة تانية قدام نفسك مكسور وحزين وبتحاول تخرج من حزنك بالتقرب الى الله يمكن يشد من ازمتك

شئ صعب اوى على البنى آدم

انه يكون بصورتين

ساعات اقول لنفسى لما بدايه السنه كدة اومال نهايتها تبقى ايه

استغفر الله العظيم

انا عارفه ان ده غلط والمفروض ميكونش الواحد تفكيره تشاؤمى

بس بيكون غصب عن البنى آدم

حتى تانى يوم فى السنه نزلت بوست لاغنيه شيرين

شايفها كلمتها حساسه اوى

اتنين فى مرايه واحدة بس مش عارفين يميزوا بعض

يا ترى مين فيهم؟!!!!!!!!

طبعا اللى هيقرا بدايه الفضفضة مش هيكملها عشان ميتعديش

هاهههههههههه معلش بقى

اكيد هيا حاله وهتعدى

وبكرة يبقى احسن وافضل

بس محتاجه عون ربنا معايا بجد

محتاجاه يساعدنى فى قوى نفسى

عشان كدة بقول يا رب

وقولوا كلكم معايا يا رب

عشان احنا كلنا محتاجين عون ربنا ويانا

وعشان الاحداث اللى فى حياتنا تتحسن واذا بقى متحسنتش

نحاول نتغلب عليها برضو

ما هى الحياة كدة مفهاش راحه

ولا ايه يا بلوجريييييييييييييييز

هاههههههههههههههه

وربنا قال خلق الانسان فى كبد

هيا الحياة كدة لازم نعيشها يا نكسبها يا تكسبنا

تفتكروا مين اللى هيكسب

؟؟؟؟؟؟؟؟؟؟؟؟؟؟؟؟؟؟

هتعمل ايه

هتعمل ايه لو نمت يوم وصحيت
بصيت وشفت نفسك فى المرايه بكيت

جواك سؤال تصرخ تقول انا مين.......... انا مين

انا زى ما انا..... ولا انقسمت اتنين

........زبعدين وبعدين

قول ياللى فى المرايه فهمنى ايه الحكايه

فرحان...... تعبان......... مرتاح...... ندمان

حاجات كتير فى حياتنا اتسببت فى حيرتنا وآدينا عايشين....... راضين........ جايين......... ورايحين
هتعمل ايه لو نمت يوم وصحيت

ولقيت اقرب ما ليك مش حواليك

هو انت مين اللى عمل كدة فيك.... كدة فيك مش انت ولا فى حد غم عنيك

وبعدين............. وبعدين

قول ياللى فى المرايه فهمنى ايه الحكاية

فرحان تعبان.......... مرتاح........... ندمان

حاجات كتير فى حياتنا اتسببت فى حيرتنا وآدينا عايشين........ راضين......... جايين......... ورايحين

شيريـــن

اه لو تعرف ...........نجاه

قوة عقلك الباطن

ياه اخيرا رجعت هنا من تانى مريت كتير وجيت كتير وكل مرة اغالب روحى واقول هقول اللى جوايا لكن مبعرفش ايه اللى يجرى او اللى بيحصل كان جوايا كلام كتير ومواقف اكتر ولما كنت بغالب نفسى واكتب حتى ولسه اعمله مونتاج وابقى لسه هعمل حاجات اخيرة معرفش برضو ايه اللى يجرى وزى ما يكون مودى دايما كان معاكس او مخالف لكن المرة دية قررت انى لازم انزل حاجة للنور

من فترة مش ببعيدة يعنى جبت كتاب اسمه قوة عقلك الباطن

والكتاب ده يرجع الفضل فيه لاختى وصديقتى ايمان صاحبه مدونه شلال العطر مرة زمان كنا خارجين ويا بعض يمكن الموضوع ده عدى عليه سنه تقريبا وكانت ايمان ساعتها بتدور على الكتاب ده وروحنا مكتبه كدة وسالنا عليه بس مكنش موجود واخدنا ساعتها كارت للمكتبه عشان تبقى ايمان تتابع وساعتها فاكرة ان ايمان كلمتنى عليه بايجاز وانه كتاب جامد وبيتكلم عن قوة خفيه فى الانسان وفيه ناحيه نفسيه كتير طبعا المهم معرفش ايه اللى جاب الحوار تانى وسبحان الله بعد فترة مش قصيرة وحسيت ان الكتاب بعد ما جبته وبتكلمنى عليه انه شاددنى اوى وكمان اللى شجع اكتر انه كان وياه ساعه ما جتلى حسيت ان فيه انجذاب رهيب وحبيت انى اقتنيه مش مجرد سلفه يوم ولا اسبوع ولا حتى شهر لقراءته لأ بالعكس تماما لأن فيه بعض الكتب كدة لازم متخلوش مكتبتك منها المهم ندخل فى الحوار عشان عارفه انى رغيت كتير

هاههههههههههههههههههههههههه عادى بقى

الكتاب فى محتواه عظيم جدا وهو بيتكلم باختصار عن قوة خفيه داخل البنى الادام انها هي المتحكم فيه وفى تصرفاته وردود افعاله وحتى فى توقعاته اللى ممكن بالفعل تحصل ليه وبصراحه لا اخفى عليكم وانا بقرا الكتاب كنت بحس بصداع كل مرة وابتدى اغالب الصداع لأن كنت ببقى مركزة زائد ان الكلام محتاج فعلا تركيز وفكر لأن بلاقى فعلا كلام مذكور كتير حصلى انا بقى شخصيا مش مجرد يعنى كلام مؤلف وخلاص

اولا محتويات الكتاب

1. 
   
   الكنز الذى بداخلك


2. 
   
   طريقه عمل عقلك


3. 
   
   قدرة عقلك الباطن على صنع المعجزات


4. 
   
   دور العقل فى الشفاء خلال العصور القديمه


5. 
   
   دور العقل فى الشفاء فى العصور الحديثه


6. 
   
   طرق عمليه فى العلاج عن طريق العقل


7. 
   
   العقل الباطن يميل الى الحياة


8. 
   
   كيف تحصل على النتائج التى ترجوها


9. 
   
   كيف تستخدم قوة عقلك الباطن فى تحقيق الثروة


10. 
    
    من حقك ان تكون غنيا


11. 
    
    عقلك الباطن شريك فى نجاحك


12. 
    
    كيف يستخدم العلماء العقل الباطن


13. 
    
    عقلك الباطن وعجائب النوم


14. 
    
    عقلك الباطن والمشاكل الزوجية


15. 
    
    عقلك الباطن وسعادتك


16. 
    
    العقل الباطن والعلاقات الانسانيه المتآلفه


17. 
    
    كيف تستخدم عقلك الباطن فى الصفح


18. 
    
    كيف يزيل عقلك الباطن العوائق العقليه


19. 
    
    كيف تستخدم عقلك الباطن فى التخلص من الخوف


20. 
    
    كيف تعيش بروح الشباب

عشرون فصل يتحدثون عن كل الجوانب التى تحيط بالانسان فى واقعه وباختصار الكتاب بيتكلم ان عقلك الباطن ليه دور كبير جدا فى حياتك لكن للاسف الدور ده متخفى مش ظاهر مش كتير مثلا بيصادف لما بتنام بتحلم حلم معين وممكن يتحقق سواء الحلم ده مثلا بالخير او بالسوء لحد مثلا مضايق منه او حاجة مش شرط بالظبط لكن ولو جزء منه ده عشان انت من داخلك عقلك مقتنع بده او مثلا واجهت موقف بس انت خايف منه عشان عقلك الباطن خايف من رد فعل معين وللاسف ساعه ما تقدم عليه فعلا بيتحقق خوفك لكن لو انت مخفتش مكنش فيه اى حاجة

وكل ده من عقلك الباطن

شفت بقى عقلك الباطن عمل ليك مشكلة ازاى

هاههههه:)

المهم

الكتاب افسح مساحه كبيرة ان كمان عشان تحقق اهدافك ونجاحك مش كفيل ان يكون عقلك الباطن بيردد ده بينك وبين نفسك او مقتنع بيه من جواك لأ لكن يكون ايمانك كبير برينا وتصلى بصدق العجيب ان الكاتب بيتحدث ان المشكله ان الانسان مش مشكلته فى انه يؤدى الصلاه لكن المشكلة الاكبر انه يؤديها كما ينبغى بصدق وبصفاء حتى يتقبلها الله ويلبى مطالبه على الرغم ان الكاتب اجنبى ويختلف عننا الا انه كانه يتكلم عن جوانب العقيدة الاسلاميه ككل فى كل كلامه وحديثه

الكلام مش جديد لأن كله مذكور فعلا فى عقيدتنا وباختاصر تتلخص فى

الرضا

والصفاء

وحث النفس على النجاح والقوة

وقوة ايمانك بربنا واعتقادك به

لكن هوا من وجهه نظرى حلل ده من منظور علمى ونفسى

فكر وانت قاعد مع نفسك مثلا وبتعتقد فى شئ معين او مثلا بتحلم بحاجة معينه سواء ايجابيه او سلبيه والحاجه دية اتحققت بالعفل اللى كنت بتخاطب به نفسك ساعتها هتندهش وهتقول ازاى

كتير بتحصل معانا

لكن الاغرب كمان انك لما مثلا بتدعى وتتضرع لله بصدق عشان صديق او حبيب لتلبيه امل ليه ويتحقق مفكرتش ليه بيحصل ده

عشان فيه صفاء عشان عقلك الباطن من جواك مؤمن بده

جربت مرة انك واجهت شئ سئ او فشل فى حاجة معينه لكن كان فيه نسبه نجاح برضو واكيد زعلت او اضايقت لكن رددت بين وبين نفسك ان الحمدلله على كل شئ وسمحت لنفسك بمساحه من الرضا ولقيت ربنا كافئك على صبرك وتحملك ورضاك يا ترى جربت ده اكيد صادفت مواقف زى دية بس يمكن اغلبنا مش بيلتفت لمواقف كتير بتحصل فى حياتنا وبنعديها جرب ارجع فلاش بالك لكل حياتك او بعض منها ومواقف حصلت وياك والاهم انك بينك وبين نفسك كنت بتردد بتقول ايه عشان العبرة بالدواخل وليس الخوارج

معلش يمكن يكون الكلام ملخبط ومش مرتب بس اعذرونى معلش

المهم نكمل بقى

لما قربت اخلص الكتاب وحسيت انه كله من عقيدتنا وان ازاى الكاتب حلل العقيدة الاسلاميه من منظر نفسى وعلمى قلت يااااااااه

وانا قاعدة بفكر فى الكلام اللى قريته ومواقف حصلت معايا بالفعل وكنت احيانا بكون فى دهشة من امرى واقول بجد سبحان الله ميت مرة ومش هيكفى والله

المهم كنت بسمع بالصدفة حلقه بتاعه ابله فضيله كل يوم جمعه على الرغم انها حلقه مختصة بالاطفال الا انها بالغه الاثر وبديعه وليها اثر على الكبير والصغير وده فى راى لأن بتعطى معانى حلوة للحياة وبتعلم الاطفال مبادئ جميلة

المهم الحلقة المسلسلة كانت بتتكلم عن ملك كبير مضايق وحانق من تاجر الناس كلها بتحبه وبتحترمه وهوا لأ الناس بتكرهه ومش بتحبه والوزير يجى ينقله اخبار الراجل الطيب التاجر ده ويزداد حنقه عليه اكتر

ويفضل يردد التاجر كلمه الحمدلله

والملك يزداد تعصبا اكثر ويفكر كيف يزيله ويقترح عليه وزيره بالتخلص منه ويخاف الملك من كره الناس ليه اكتر ويفكر

انه ياخد منه تجارته وحاجته

وللاسف خيب رجاه فضل برضو يقول الحمدلله والملك يزداد غضبا حتى بعد ما اخد منه ماله وحاجاته والرجل الطيب برضو راضى وبيردد الحمد لله

وفى النهاية فكر انه يعزله خالص وينفيه فى بلد بعيدة ويحطه فى مركب

وفعلا حصل ده

والراجل الطيب وهوا راكب فى المركب جت ريح شديدة جدا والراجل بيدعى ويقول يا رب اعمل اللى فيه الخير وفضل يبتهل الى الله لحد ما الدنيا هديت

والمركب رسيت على جزيرة واول ما اهل الجزيرة شافوه

جريوا عليه وجابوا وقالوه انت الملك والرجل مندهش ويقول انا الملك ازاى

العفو

يقولوه لأ احنا قعدنا مستنينك كتييييييييير وانت ملك الجزيرة

وبنت الملك السابق شرحتله قالته والدى كان حكيم وبدل ما يختار حد من اهل الجزيرة وتحصل صراعات قال اول واحد ينزل على الجزيرة يبقى هوا الملك وفعلا

والكلام ده قعدوا يستنوه سنين وانتخب الراجل الطيب ده وبقى فعلا الملك وفى مرة جاله جواب انه فيه مبادلات او عرف متبادل بين الدول او الملوك للتعارف وحصلت الصدفه وقابل الملك اللى كان هوا السبب بكرهه وحقده عليه فى اللى هوا فيه

وفى الاخر الملك اللى كان سئ آمن وقال الحمد لله ورددها عن اقتناع وحب

لو كل واحد رضى باللى مقسوم ليه عن رضا وحب وصدق هتتغير حاجات كتير فينا احنا البشر وفى غيرنا عشان اكيد بناثر على الناس اللى حوالينا بتصرفاتنا وافعالنا

والتسامح صفه كبيرة ومحتاجه تدريب للنفس عليها

وكمان الرغبة فى الوصول والنجاح محتاج تدريب

النفس ممكن تحقق اى حاجة بس اكتشفت ان الحاجات دية محتاجه تدريب مش فى لحظتها

لو زى ما بيقول الكتاب قعدت بينك وبين نفسك او قبل ما تنام خاطبت ربنا ودعيته وطلبت منه طلب وكل يوم قبل ما تنام وانت على السرير بتكلم ربنا لحد ما اتحقق ليك طلبك هتبقى سعيد قد ايه ده غير انه بيفسح مساحه حب بينك وبين اللى خلقكك واللى حواليك وحاجات كتيييييييييير

وهتبقى عايش بروح الشباب طول العمر

يا ريت كلكو تجيبو الكتاب عشان تقروه وتكتشفوا اللى فيه

معلش طولت عليكو