شكرا سياده الوزير

النهارده عيد ميلادى

السلام عليكم يا اهل النت والتكنولوجيا

عايزة اقول حاجات كتييييييييييييييييييييييييييرة اوى بقى النهارده

النهارده عيد ميلادددددددددددى

بقى عندى 25 سنه ياااااااااااااااااااااااااااااه مش عارفه اوصف الاحساس اد ايه كل ما حد من اخواتى ما يسالنى ارد وانا فرحانه اووووووووووى بقى عندك كام سنه يا كتكوته اقول بقى عندى 25 سنه احساس كطفله صغيرة فرحانه انها بتكبر وان الناس حواليها

بجد كان يوم جميييييييييييل اووووووووووى امبارح بجد وفرحانه اكتر باخواتى فى ربنا كلهم كل الناس مش عايزة اذكر اسامى عشان منساش حد

بس زمايلى اللى معايا فى الشغل بقولهم بجد مش عارفه اقولكم ايه غير ان ربنا يخليكو ليا وميحرمنيش منكو ابداااااااااااا

انا حاسه انى فى وسطكو ليا كيان وقيمه بيكو انتو وبجد شكرا لكل حاجة حلوة عملتوها عشانى

سمر ومعالى ورويدا وعلى راسهم طبعا الحاجة يسريه واستاذ ياسر

اما بقى بالنسبه للناس التانية مهما طال الزمن بينا ربنا يديم علينا الحب والود والاخوة فى ربنا لازم كل مرة كدة تلتزموا فى ذات التوقيت بليل وتتحفونى بالرسايل الجامدة بتاعتكو وكل سنه واحنا دايما اصحاب واخوات

اما بقى طبعا على راس المائدة كلها بابا وماما واخواتى الاعزاء بقولهم ربنا يخليكو ليا يا رب فرحانه بيكو زى ما انتو فرحانين بيا

وحاجة مخصوصه بقى على جنب لخطيبى العزيز

بقوله ربنا يخليك ليا يا رب وميفرقناش عن بعضنا ابدا ومعلش بقى نمت اثناء الماتش وقعدت تتصل بليل وانا كنت نايمه اوت منى معلش بقى بس تتعوض النهارده ولا ايه يا حبيبى الجميل

بحبك فى ربنا وبحب كل الناس فى ربنا

احبببببببببببببببببببببببببببببببببببببببببببببببببببببببببببببببببببببببببببببكم جمعيا مهما طال بى العمر

بالالوان الطبيعيه

سلامو عليكم

وحشتوووووووووووووووووووووووووووووووونى جداااااااااااااااااااااااا

وواحشنى جو المدونه جدااااااااااااااااااااااااا

المهم

فيه موضوعات كتيييييييييييييره عايزة اتكلم فيها وياكم بس هبدأ باللى بد وقفت قدامه كتيير اوووووووى حاجة بجد فعلا تستحق

كنا من فترة مش قريبه قررنا نخرج بعد يوم عمل شاق ومتعب نجدد بيه الحياة بس معرفناش نروح فين صديقتنا اقترحت اننا نروح بالالون الطبيعيه مفهمتش فى الاول ايه ده لأنى مش متابعه لا جرايد ولا تليفزيون لضيق الوقت وبعدين عرفت بعد كدة انه فيلم طب ممين ابطاله محدش عارف مجموعه من الشباب حسيت انه موضوع مبهم ولقينا انه معروض فى سينمات بعيده عن المكان اللى احنا فيه وسبحان الله رحنا مكان بالصدفه لقينا اعلان الفيلم موجود فى المول اللى رحناه وسالنا عليه لقينا ان لسه الوقت قدامنا المهم الاعلان نفسه شدنى اوى مجموعه شباب وداهنين بقهم بالاحمر

المهم بدأنا الفيلم مش عارفه كنت طول الوقت بفكر هوا يقصد ايه باسم الفيلم وبعدين لما الفيلم ابتدا الموسيقى بتاعته حسيت انه عايز يقولنا يا ريت كل حاجة تكون بتلقائيه وكانت هيا دية فعلا الرساله بس باكثر وتعمق

الاول مجموعه الشباب ابدعوا وفعلا بجد حسيت انهم مش بيمثلوا يمكن عشان حسين انه بيأدوا دور وقضيه بيعشيوها وبنعيشها دلوقت

الفيلم بيحكى عن شاب فى الثانويه العامه وبيجتهد وبيذاكر عشان نفسه يكون فنان هوا شايف نفسه كدة ووالدته نفسها يطلع دكتور زيها زى باقى اولياء الامور فى مجتمعنا المهم الولد نفذ رغبته ودخل الكليه

طبعا كان فيه شوية من كوميديا ساخرة باداء الفنانه انتصار فى اداء الام وانها حتى رافضه ان ابنها يكون فنان عشان الفن حرام وطبعا الاحباء الجيران وشوشوا فى ودنها بحبه كلام لطمت على الخدين بس الولد صمم على رغبته وراح الكليه

جو غريب وناس اغرب جميل ان الانسان يكون فنان لأننا بفطرتنا ربنا خالق فينا ناحيه جماليه عشان نقدر نعيش فى ملك ربنا ونتامل فى ابداع ربنا المحيط بينا بس الناحيه الفنيه دية بتختلف من شخص للتانى وفيه شخص بيكبتها وفيه شخص بيطلقها للعنان

المهم ان الولد اصطدم لأن لقى الدكاتره بيدرسوا الفن على اساس العرى ازاى ارسم شخص عريان وعشان ننجح لازم نتعرى فا طبعا كل واحد قلع ورسم اللى قدامه

طبعا شئ يدعو للرثاء الفن شئ جمالى وهبه من عند ربنا ازاى احوله لجريمه بشعه يعنى هوا كل العرى يبقى فن اكيد لأ

والولد زيه زى شباب جيله متخبط حس بالذنب وكل شوية بيكلم ربنا مش عارف ايه الصح من الغلط ينفذ رغبه امه ولا هوايته اللى جواه وحاول من تانى وساب الكليه حول لكليه عمليه زى والدته ما عايزه حاول فعلا بجد بس مش قادر بيلاقى نفسه وهوا بينه وبين نفسه فى لحظات وحدانيه بيرسم حاجة لا اراديه

ورجع تانى للكليه مقدرش يقاوم بس على شرط انه مش هيعمل حاجة غلط طب ازاى والدكتور مشترط انهم لازم يرسموا حد عريان وتبدأ لحظات التخبط فى الشباب سن حرج اووووووووووى بجد

الولد كان ليه احساس فنان بجد ونفسه ينفذ حاجة بجد بس اللى حواليه مش مساعدينه وزميلته اللى بيحبها اهلها اول ما شافوا الاسكتش بتاعها كانوا هيمنوعوها من المرواح للكليه او انها تحول اى قسم تانى خالص بعيد عن الحاجت دية

اصعب شئ ان الانسان يكون فى صراع نفسى بين داخله والواقع اللى بيعيش فيه

فى مرة قرروا انهم يذهبوا فى رحله فى المركب الولد شاف نافوره فى وسط النيل حب انه يقف عليها ويوصلها ويتامل الكون من حواليه ووصل ليها فعلا بس كان الشئ المؤسف انه زمايله سابوه ومشيوا

الموقف ده خلانى افكر انه زيه بالظبط اللى احنا بنعيشه لما الواحد بيكون شايف او حاسس بحاجة ممكن اللى حواليه حاسين انه شئ غريب او مش عادى بيعتبروك مجنون او احمق فا بالتالى بيسبوك ويمشوا ولا الزمن بيلف لفته بتلاقيهم وياك شئ غريب فعلا بس دية سنه الحياة المهم نرجع لموضوعنا

الولد استمر على مبادئه وفى حبه لزميلته بس طبعا كتر المعاصى والمجون ممكن بيحول الانسان من 0 الى 360 درجه مرة واحدة انقلاب شباب وكل اللى عايزين يعملوا بيعملوا فنانين بيرسموا بيتعروا بيحبوا بيمارسوا بيعاشروا كل شئ مباح ياااااااااه صعب جداااااااا الاحساس ده انك بتعمل كل حاجة وبعدين بتتحول من النقيض الى النقيض وبتبعد عن كل اللى حواليك حتى اللى بتحبه تخبط داخلى بدرجة فظيعه

المهم فى النهايه عشان مش عايزة احرق الفيلم الولد طبعا واجه تخبطات كتيرة لحد ما خلص الخمس سنوات بتاعه الكليه لكن فى الاخر صمم على مبادئه بغض النظر انه ده هيخسره حاجات كتير ومستقبل هوا يستحقه بس المهم انه مبادئه متمسك بيها

والناس من حواليه رجعوا ليه تانى والدته والبنت اللى بيحبها وبتحبه بصدق

على الرغم ان اللى بيمثل فيه مجموعه شباب متعرفهمش لكن اثروا فيا جدااااااااااا واتأثرت بالفيلم لدرجه خلتنى ابكى بشده

اولا: لما بيكون الانسان مش عارف هوا مين او هيعمل ايه بيلجأ لربنا وبيتكلم وياه بصراحه ووضوح او عايز يكلم ربنا او يصارحه فى حاجة بتكون من جواه مش هيعرف يتكلم وياها مع بشر زى ما الولد كان بيعمل فى الفيلم بالظبط

ثانيا الفن شئ جمالى عمر ما كان الفن مقياسه بالعرى زمان فى افلام الابيض والاسود لو تفتكروا لما بيكون فيه مثلا مغنى زى فريد او عبد الوهاب بيأدى الاغنيه بتاعته فى الفيلم وفيه اسكتش وفريق وياه ما هما كانوا لابسين ومش لابسين بس عمر فيه حد علق على ده معتقدش عشان التركيز على الفنان نفسه وحسه واحساسك بيه كان صوت عبد الوهاب او فريد او عبدالحليم بياخدك بعيد جداااااااااااا محدش كان بيلتفت فى الناس اللى بيرقصوا وراهم دول لابسين ايه

الفن شئ محترم حاجة لازمه فى حياتنا لكن للاسف التيار عكس كدة وعايزين الناس تفكر فى غير كدة ونعلم الشباب او منعلمهمش زى ما الفيلم عملوا بدعوى انهم بنوا نفسهم بنفسهم فلفسه ساذجه وبايخه

الحب لازم يكون موجوده فى حياتنا ونمارسه بحب واحترام لكن لما بيزيد وبنفقد السيطرة عليه بيكون شئ صعب جداااااااااااااااااا زى بالظبط احساس البنت انها بتمارس حاجة ربنا هيعاقبها عليها مع انها متاكدة من حبيبها واتخطبوا لبعضهم وكل شئ تمامبس الضمير الحى اللى بيكون جوا الانسان هوا اللى بيخليه يفكر لأن هوا الرادع عن ملذتنا

ثالثا الاول لما الولد ركب ويا اصحابه المركب وقالهم عايز اطلع فوق عند النافوه عشان نفسى ابص المنظر من فوق سابوه ومشيوا وسخروا منه فى آخر الفيلم عملوا نفس الرحله وطلب نفس الطلب بس المرة دية اتحايلوا عليه عشان يفضلوا مستنينه ومش عايزين يسيبوه ويمشيوا يمكن عشان ابتدوا يفهموا الحياة صح او يفهموا صاحبهم هوا صح

رابعا صعب جدا ان الانسان من جواه بيعيش كل الوان الحياة ولما بيلاقى نفسه مرة واحدة بقى فى مسئوليه بجد ومسئول زى الولد اللى بيحب البنات جداااا وفضل يحب فى بنت وبيعيش وياها لحد ما انجب ولد هوا من جواه مش عايز مسئوليه ووجع دماغ بس لما قعد وفكر وياه نفسه حس ان لسه حاسه الانسان جواه وان اللى هيتولد ده ابنه من صلبه بغض النظر بقى ان ده جواز عرفى ولا زفت ولا علاقه وخلاص بس للاسف الاحساس جه متاخر اووووووى لأن الام بعد ما ولدت وشاف المولود وفرح بيه سافرت بيه وهاجرت بيه بره لالمانيا

يااااااااااااااااه طب مكنش من الاول ليه ولا الشيطان كان هوا المتحكم من الاول فى الحياه

خامسا حاجة احنا بنعيشها دلوقت او بمعنى اصح بتعيشها اغلب البنات البنت بتلبس اللى بتلبسه وبتعمل اللى عايزاه انا طبعا بقصد فئه معينه وبعدين من كتر التخبط والضغوط والنفسيه وكلام مشايخ يمين وشمال وشرق وغرب لقت نفسها انها بتعمل حاجة حرام واللى بتدرسه حرام فى حرام فا بتعمل ايه انتقبت وبعدت عن القسم اللى فيه وحولت حتى لو ده مش بتحبه بس هتجاهد وبعدين فضلت شوية على كدة وبعدين رجعت اسخم من الاول لأنها هيا مش عارفه هيا عايزة ايه بالظبط احساس صعب جدااااااااا محتاجين نقف قدامه كتيييير اوووووووى

سادسا الموديل اللى كان فنان زمان وفشل اثناء الدارسه وخسر نفسه دية رساله ان اللى هيستسلم هيخسر نفسه زى الراجل ده الشخصيه اللى مثلها الفنان القدير سعيد صالح دور صغير وبسيط اه بس بجد فيه معانى كتييييييره

سابعا ابحث عن نفسك ومتتخلاش عن احلامك ولا طموحاتك بس بالطريق الدوغرى الصح لا مش دوغرى وصح يبقى بلاش منه زى بالظبط الولد اللى فضل خمس سنين مرماطون للدكاترة والمعيدين عشان يضمن انه يكون المعيد وفى الاخر مبقاش معيد بقى حاجة تانية فى حين ان الشاب التانى بطل الفيلم تخلى عن انه يكون معيد مش مهم المهم انه يوصل رساله لاساتذته من خلال فنه وهوا المطلوب اثباته

ثامنا دكتور الجامعه اللى بيستبيح لنفسه ان الطلبه تشتغل عنده ويشغلهم مقابل اجر زهيد بالمقارنه باللى بياخده عشان يرسموا لوحات وينسخ عليها اسمه ياااه جره قلم انهت كل شئ

والمعيده التى لا تفقه اى شئ فى الفن غير انها بانوثتها وصلت الى ما كانت تصبو اليه.

بجدبجد محتاجين تكاتف ووقفه جامدة عشان احنا الشباب وعشان الشباب اللى جاى كفاية تحطيم اكتر من كدة وكفايه انحطاط فى المستوى الاخلاقى كل واحد بيدور على مصلحته والبقاء للاقوى وكل واحد وواسطته بس فى النهايه ربنا فوق الكل موجود

اللى محتاج حاجة او حاسس بازمه يرفع راسه لفوق ويقول يارب واتكلم براحتك عشان ربنا سامعنا وشايفنا وحاسس بينا

وخلى كل حاجة فى حياتنا

بالالوان الطبيعيه عشان نعيشها صح

يا ريت تتفرجوا على الفيلم ومش لازم سينما غاليه ولا يحزنون شوفوا سينما معقوله فى اقرب حاجة لسكنكوا وابقوا قولوا ايه رايكم

معلش طولت عليكم

بس للحديث

......

.....

.....

بقي

الحب لحن جميل

الحياة جواها فوايد وتعاليم

سلامو عليكم

بيقولوا فى حكمه العقلاء الدنيا مدرسه والمدرسه بتاعتها واسعه اووووووووووووى نتعلم منها كل شئ واى شئ

تعرفوا من كام يوم كنت واقفة على محطه الاتوبيس كنت مستنيه مواصله تنقلنى للمكان اللى عايزة اروحه فا لقيت من

قدامى اتوبيس عدى وموقفش فى المحطه يمكن هدى بعد المحطه بشوية وطبعا الواقف المسلوخ فى الشمس مش هيقول يلا مش مشكلة لأ طبعا هيجيب ديل الجلبيه فى سنانه ويجرى عليه وده اللى حصل بجد الراجل صعب عليا

اووووووووووى

وبعدين قعدت افكر شوية وقلت ايه نط فى دماغى موضوع قديم كنت بتناقش فيه ويا زمايلى ايام شغلى القديم وبما اننا

كنا من هوايات الجرى ورا الاتوبيس والماسكه فى العمود لحسن نطير وخلافه بقى ايام كانت كفاح وجميلة بصحيح المهم

كنت دايما من انصار ان ركوب المواصلات العامه فيها فلسفه جامدة اووووووووى

اول حاجة من الناحيه الاجتماعيه انك بتحس بالناس اللى حواليك وبتشعر بيهم وبتلاقى مواقف كتير بتقابلك وممكن كمان

من حديث ناس انت راكب وياهم تستفيد منه او يخفف عنك هم لأن همهم اعظم من همك فبالتلى هتفكر فى الحوار

وهتعرف ان ربنا رؤوف بيك وان الحمد لله انت احسن من غيرك برضو

تانى حاجة انه بيعلمنا الصبر لما بنيجى نركب الاتوبيس زحمه شوية الزحمه المقبولة اننا واقفين مرتاحين بتشوف الدنيا

وبعدين بتبقى واقف محتمل لحد مااااااااااااا ايه تلاقى حد ييقوم بقى ويكون شهم او الاتوبيس او المينى باص او المترو

يروق وتلاقى مكان وتقعد وبالتالى انك محصلتش على الحاجة بسهولة

تالت حاجة انه بيخليك تتامل فى وجوه البشر اللى حواليك وتلاقى الانيق والغلبان والفقير واللى بيدعى الفقر واللى

بيشحت كل واحد لو قعدت تتامل فيه شويه هتفهم الدنيا اللى حواليك والناس وفعلا الناس بقت غريبه اووووووووووى

ده ناهيك عن البنات وكلامهم وبقوا بيفكروا ازاى وبقول البنات عشان انا فى المترو مش بركب غير فى عربيه السيدات

اما الاتوبيس وكدة وخلافه البنات فيه بتتلم شوية او يمكن بيكون فيه مرقعه بس على خفيف

رابعا ممكن حد يطلب منك المساعدة انك تشيل وياه حاجة تقيله او تعديه سلم او خلافه وساعتها بتاخد ثواب عظيم

خامسا بقى لقيت ان كمان لما بتيجى تركب الاتوبيس وتجرى وراه اديك عملت رياضه ولا بقى تقولى تروح لجيم وتدفع

آد كدة ولا يحزنون رياضه ببلاش اهو رياضه الناس الغلابه الشقيانه اللى كل يوم متبهدله فى المواصلات

سادسا انك متحسش انك مرتاح على طول وبتشارك الناس مش عشان ربنا كرمك وتقدر تركب عربيه او غيره مواصله

مريحه تنسى بقى لأ انت بتشارك الناس وعشان تحس ان الحياة فيها كدة وكدة

آخر حاجة والحاجة اللى مفروض تتم وللاسف اختفت دلوقت لما تلاقى حد كبير اكبر منك او تعبان والدنيا زحمه وعايز

يقعد بتقوم سواء بقى امرأة او راجل عجوز او سيدة حامل او حامله لطفل وهكذا

وده بيخلى فيه تراحم بين الناس وبعضها

وللاسف الناس دلوقت بقت بتطنش والاطفال آباهم وامهاتهم بيعلموهم دلوقت التلامه ويقعدوا براحتهم على الكنبه ولا

الكرسى ومش مشكلة اللى واقف يولع ولو كان عاجبه

معلش يمكن يكون الكلام غريب بس هوا ده العادى بتاعى

هاههههههههههههههههههه

ما احنا اتفقنا خدوا الحكمه من افواه المجانين

........................................

امبارح كنت راكبه المترو كنت رايحه اجيب الحاجات وكدة عشان بنحضر لمفاجأة اميرة اللذيذة فى عيد ميلادها مش هنقول الكام عشان منحرجهاش بس

انا وايمان وندا كنا عاملين تخطيط والحمد لله تم بحمد الله والكل انبسط وقضينا وقت جميييييييييييل اوووووووووووووووى

وانا راكبه وواقفه بستعد لنزول المحطه اللى جاية لقيت راجل عجوز بس انتيكه اوووووى لقيته واقف باصص فى الساعه وزى ما يكون تعبيره مندهش اوووووووووووى

وبعدين سالنى هيا الساعه تلاته ولا اربعه

قولتلو اربعه

قالى ليه

ونظام بسرعه بقى الباب كان هيقفل وكنت حاسه انه هيجراله حاجة

هيغروها اربعه ليه

قولتو عشان حضرتك الساعه اتغيرت امبارح التوقيت الصيفى بقى

بصراحه بقى الموضوع ملخبط اووووووووووى

وبقت الناس مش فاهمه حاجة

انا عن نفسى مكنتش اعرف ان الساعه اتغيرت الا تانى يوم لما بابا وماما قالولى ومكنتش مصدقاهم والساعات حواليا بنفس التوقيت القديم

الله مش كانت آخر خميس فى ابريل نقدم الساعه وآخر خميس فى سبتمبر ناخرها

بس الظاهر لما السنه اللى فاتت جه رمضان فى سبتمبر وقالوا نرجع التوقيت الشتوى عشان رفقه بالصائمين وكدة وكمان كان التاخير قبل الميعاد المعتاد ليه فا بالتالى اترتب عليه انهم يقدموا كمان اليوم اللى نقدم فيه الساعه

بس هوا سؤال بيطرح نفسه هوا احنا ليه بنقدمها ولا بناخرها ليه منثبتش على توقيت واحد حتى يكون اريح للناس بدل ما بيحصل لخبطه

هما ليه بقى قدموا الساعه

ها

ليييييييييييييييييييييييييييييييييييييه

هاهههههههههههههههههههههههههههههههههههههه

نترك الاجابه للساده الافاضل

اللى هيدلو برايهم

ونترككم الان ولنعود بعد الفاصل

ما احلى الجنون فيه

مساء الخير عليكم جمعيا

انا عارفه انى بقيت رخمه وبتاخر كتير بس اعمل ايه دايما اركب توتوك يوصلنى لحد هنا وافضل زى التايه جوايا حاجات اعملها واقولها لكن مش عارفه اقول حاجة جوايا حاجات كتيييييييييييييير اووووووووووى بكون عايزة احكى عنها بس ياما بكون كسلانه او مرهقه او لاسباب نفسيه تانية المهم انى من كام يوم بالتحديد يوم الاربع اليوم كان بدايته عادى بس انتهى فى الاخر بتهييس جامد اووووووى عارفين لما يكون الواحد بيحس بحاله من الجنون بيضحك اوووووووى وبيهييس بقى بقيت اهيس مع العملا واضحك وبعمل حاجات غريبه واصحابى معايا بيضحكوا معايا

هاههههههههههههههههههههه حاله بعيشها كدة ويا نفسى امتى بالتحديد بتيجى الله اعلم بس لازم تيجى عشان احس انى بعمل حاجة نفسى اعملها وان جيتو للحق انا اصلا مجنونه بيكون نفسى اعمل حاجات مجنونه كتييييييير اووووووووى بس بحجم نفسى وساعات مش بقدر فا بتلسع بحب اعيش الحياة كدة عادى بتلقائيه ومرح زى ما خلقنا ربنا

المهم ندا صاحبتى اتصلت بيا وقالتلى نتقابل وكدة انا وانتى وايمان وبما ان مواعيدى فى الشغل دلوقت صعبه وبقينا عبيد فى الشغل هاههههههههههه بقيت طبيعى جدا مش بعرف اعمل اى حاجة بعد مواعيد الشغل اللى مبقاش فيها ليها مواعيد حسيت انى محتاجة اشوفهم مع اننا لسه شايفاهم قريب يعنى لكن مش عارفه حسيت ان الخروجة مكنتش متظبطه اوى وراجعين بيوتنا عادى مش عارفه ليه واللى كان مضايق واللى كان سرحان واللى واللى فا حسيت انهم واحشنى اوووووووى طب والشغل بصراحه قولت لندا انى مش اكيد هقدر آجى بس لو عرفت هتصل بيكى واقولك عشان تستنونى عشان هتاخر عليكو شوية مش هعرف اتقابل فى نفس ميعادكو بس بعد ما قفلت خلاص ركبت فى دماغى انى هشوفهم ويولع بقى الشغل على التحديث على اى حاجة المهم اننا نستنشق هواء نقى نشوف مناظر طبيعية اشوف بنآدمين اشوف اخواتى فى الله كدة يعنى

المهم اخدت العزم وعلى تمام الساعه خلاص لميت حاجتى واتوكلت على الله اللى قلقنى بس موضوع المينى باص اللى على طول بنطلطع كتير عقبال ما يجى المهم الحمد لله ركبت وطمنتهم انى فى السكه وشفتهم وقعدنا ويا بعض ومستمرين فى نظام التهييس

بس كان يوم تحووووووووووووفة وايمان حبيبتى غنت وعرفتنا على بنت عسولة اسمها مصريه رقيقه اووووووى وصوتها جميييييييييييل يااااااااااااااااه انا عارفه المواهب دية مش بتعبى شريط ليه ولا لازم يصدعونا ويسودوا عيشتنا بببحبك يا حمار .........هاههههههههههههه يلا الغرض قعدت احكيلهم عملت ايه ويا العملا والمواقف المضحكه اللى حصلت وقعدنا نضحك ويا بعضنا وكدةبس لفت نظرى حاجة جميله اوووووووووى كان فيه قطه جت وقعدت على الكنبه اللى احنا قاعدين عليها كانت بتعمل حركات غريبه اوووووى وحتى التنفس بيتاعها غريب مقدرتش امسك نفسى قلت لازم اصورها واصورها فيديو كمان بس للاسف اللقطه اللى بكون عايزاها بتبقى عدتنى

القطه نايمه فى سكون بس مفتحه عنيها وبتحاول ترفع راسها لفوق وبتنفس وبتبص على الناس يااااااااه اتهيئلى انها كانها بتقول عايزة استنشق هواء نضيف بقى وكان لسان حالها بيقول وهيا بتبص للناس مستغرباها ايه كل الناس دية ومالهم عاملين كدة ليه وايه اللبس الغريب ده يعنى اتخيلت كدة

وبعدين فضلت عنيها تنعس حبه بحبه لحد ما غمضتت ياااااااااااااااااااه كاااااااااااااااانت صورة بديعه بجد الواحد يقول فى سره لمخلوقات ربنا دية لما يشوف ويتابع حركاتها يا سبحان الله

وكان الطير فعلا يسبح بحمد ربنا ودية حقيقه وانا شوفتها بعنيا مرة كنت نازلة فى صلاه عيد وشفت القطه واقفة على عتبه الباب بتاع العمارة وبتسمع الاذان وودنها بتهتز وواقفة فى سكون عجيب بجد استغربت اوووووى ساعتها ياااااااااااااااااااااااااااه آآآآآآآآآآآآآيه من الجمال

بجد بجد اللى بيتامل فى مخلوفات الطبيعه بيحس بآد ايه جمال عظمه خالقنا وحكمته وسبحانه

المهم محسناش بالوقت هووووووووب كلنا نطينا بس كان نفسى نعدى على معرض كدة لمحته بره وانا داخله بس قلت بعدين بقى ابقى اعرف ايه دهلما اقابل اخواتى فى الله

المهم وقفنا واتفرجنا كان معرض لبنت فنانه بتعمل مشغولات اكسسوار حاجات هيا بتعملها وحاجات بتسوقها بس بجد عجبنى جدااااا وعجبنا كلنا وخصوصا انه اسعاره رخيصه وزوقه حلو اوووووووووى تبقى مش عارف تجيب ايه ولا ايه وانا عموما بحب الاكسسوار بحس انه بيضفى نوع من البهجه والتجديد وبما انى كنت فى نفس الحاله اياها فا جبت شوية كنت مبسوطه بقى وكمان بحب اشجع اوى اصحاب المواهب فا جبت حاجة البنت عملاها رقيقه اوووووى زيها وحاجات تانية هيا بتسوقها وكمان عجبنى مبدئ البنت اووووووى وعلى فكرة المعرض مستمر فى الساقيه لحد يوم 19 للى يحب يروح ياخد فكرة حتى

المهم وانا مروحه خلاص حددت انا هلبس الوان ايه وانا ريحه الشغل بكرة وهلبس عليه العقد الجديد اللى لسه جايباه وانطلقنا جرى على بيتنا وانبسطنا اووووووووى لدرجة انى كنت بضحك وانا فى المترو من جوا ومقدرتش امسك نفسى الا لما نزلت رحت مكلمه ايمان وعمالة احكيلها على حاجات بعلق عليها وكدة وانا مسخسخه هو خلاص بقى الحاله جت

المهم صليت وكويت هدومى جيت عند الايشارب بقى طب ايه بقى وبعدين الافضل احطه على شماعه بقى احسن عشان ميتكسرش لو علقته فى الشماعه اللى ورا الباب هيتكسر بلاش المهم قعدت ادور على شماعه والدنيا ليل وبابا وماما نامو مفيش فى دولابنا فا قلت ادعبس بشويش فى اوضه بابا وماما طلعت بشماعه كدة ولما خرجت وبعد ما علقت الهدوم عليها كنت معتقدة انها تنفع ومستكمله عادى التعليق وهيا اصلا من فوق الدايرة بتاعتها نصها مكسور يعنى مش هتعرف تتعلق طب اعمل ايه اعمل ايه وكسلت بقى اجيب واحدة تانية خلاص ركبت معايا انى هعلقها على دية قلت ادور على حته قماشه شريطه اربطها فى الشماعه واعلقها على ورا الباب وبعدين قلت طب ما اربط الحزام واعلقها هاهههههههههههههههههههههه وفعلا قد كان عملت كدة وانا طايرة من الانبساط واخدت دش عشان العملية تكمل وصليت لربنا وحمدته وشكرته ودعيت لاخواتى وشوف بقى يا اخى التهييس كنت هكتب لندا رساله بليل قبل ما انام وبعدين خلاص عنيا بتقفل قلت زمانها هيا كمان نامت المهم بعد ما نمت صحيت على رسالتها الساعه 3 الصبح هاههههههههههههههههههه مش بقولكو شله مجانين احنا وانا كمان رحت رده عليها

وقلت ياااااااااه ده اللى بقكر فيه نفس اللى بتفكر فيه هاهههههههههههههههههههههههههههههه ربنا ما يحرمنا من الجنان والحب ابدا

بس للاسف بقى الموضوع مش على طول بقى يبقى كدة وتكمل الدنيا وتبقى سعادة على طول

تانى يوم صحيت حاسه بحاجه حاسه ان فيه حاجة غريبه كانى كنت امبارح انسانه ولمما صحيت الصبح كنت انسانه تانية قلت خير وحاسه ان فيه حاجة غريبه وقد كان وصلت للشغل

واتصدمت بحاله الزوبعه العظمى كان المدير كان فى حاله هياج اول مرة نشوفها كلنا يلا منه لله بقى اللى كان السبب فى كدة وراسه والف سيف اننا هننزل شغل جمعه وسبت وموت بقى فى الشغل وبتاع وفيها حبس للى مش هينزل هاهههههههههههههههههههه وانا عمالة اقول فى سرى يا دهوتى لأن موعدا ناس على رحله يوم الجمعه طب ايه

مش عارفه جالى حاله كدة من السكون والقلق والتكفير والاكتئاب عشان برضو يوم الاجازة ده الوحد بيستناه بفارغ الصبر عشان يتحرر ويعمل اللى هوا عايزه لأن بتخنق لما بلاقى حد بيسلب حريتى على غير رغبتى او ارادتى بتعب نفسيا اوووووى اه بتعود وكدة بس كل حاجة ليها حدود ايام الشغل هنسهر وكدة ماشى لكن فى يوم الاجازة كمان صعب اوى كدة العملية ده غير انى فعلا محتاجه لتغيير جو

المهم الحمد لله ربنا سهلها من عنده وطلعت الرحله ويا اخواتى فى ربنا وكان وقت ممتع جدااااااااااااااااااااااااااااا اكتر من المرة اللى فاتت وحسيت انى انبسطت اوى وانبسطنا كلنا سوا وكان نفسى نبقى هناك ياااااااااااه منظر الورد والميه والخضرة والسما يااااااااااااااااااااااااه جمييييييييييييييييييييييييييييييييييييييل والحمد لله وشى معرفتش نفسى فى المرايه عفريته عشان قعدنا فى الشمس وتانى يوم نزلت الشغل بروح تانية متجددة وسهرت فى الشغل بس كالعادة بقى كعادة الدنيا يعنى يوم حلو ويوم مر

حاسه بروح هدوء كدة سكون مش عارفه مقدرش اقول عليها اكتئاب بس لما تكون حاسس انك شغال فى ساقيه بتتضايق وكمان لما تحاول تنشل نفسك من حاجة تقع فى حاجة تانية ملهاش نهاية بقى هتعمل ايه هتضايق

وكمان بحس الدينا مش مستاهله لحظه الم او حزن او نكد

حلوة الحياة لما نعيشها كدة زى ما هيا على راى محمد منير

هاههههههههههههههههههههههههههههه

بس النهارده كان يوم يدعو فعلا للسكينه

رئيسه القسم عندى طلبت منى كشف حساب لواحد مات ببص للاسم انا عرافه الشخص صاحب الحساب ده اتاثرت اووووووى بموته وافتكرته لما كان بيجى ويسال على حسابه والمعاش دخل ولا لأ وافتكرت اول لقاء بينا لما جه الصبح بدرى اووووى وطلب كشف حساب عشان يورى مراته وولاده انه ده اللى قبضه وان معاشه زاد بملغ كذا بس مش اكتر الكلام ده وقت الزيادات ولخبطه الناس وقعد يحكيلى انهم بيتهجموا عليه وبيضربوه وكدة وقعد يعيط ويترجانى انى اكتبله ورقه او اجيبله ورقه من البنك

بس بجد اول مرة كان قدامى وهوا بيحكى ولسه بقى ساعه صبح مقدرتش امسك نفسى دموعى نزلت قدامه وهوا قعد يعتذر انه نكد عليا وكدة يلا هنعمل ايه بقى هيا الحياة كدة برضو

المهم السؤال اللى جه ف بالى يا ترى عم فريد مات موته ربنا ولا من كتر الضغوط عليه من مراته وولاده مات مثلا متاثر ولا ايه بالظبط

بس على كل الاحوال ربنا رحمه

واتمنى انه ربنا يجعل مثواه الجنه جزاء صبره على الظروف اللى كان فيها ويهدى اهله ويصبرهم لو هما زعلانين عليه

مش عارفه ليه غصب عنى ساعات بقف عند حاجات غريبه او عجيبه واقف عندها افكر فيها وممكن اتاثر بيها واقعد اتعب نفسى فيها وفى الاخر بقول خلاص

لله الامر من قبل ومن بعد وربنا يصلح حالنا اجمعين

عادى بقى مهو الجنان جنان برضو

هاههههههههههههههههههههههههههههههههههههههههههههه

والجنان نعمه على فكرة ربنا ما يحرمكو منها ابداااااااااااااااااا

عارفين ليه عشان تبقى منطلق وتبقى على طبيعتك ووقت ما انت عايز تعمل حاجة اعملها ومحدش هيلومك عشان هيقولوا عليك

اممممممما مجنون صحيح

يا مجنون

هاههههههههههههههههههههههههههههههههههههههههههههههههههههههههههههههههههههههههههه

والمجانين فى نعبم يا جماعه

عيش مجنون ترى الوجود جميلا

دية حكمه العقلاء.........اقصد المجانين

يلا سلاموز والى اللقاء قريبا عشان لسه الكلام مخلصش

هيا الحياة كدة

سلامو عليكم

بقالى كتير مكبتبش حاجة هنا

مش عارفه ليه

يمكن عشان الوقت يمكن عشان ذهنى مش صافى ................ يمكن.....جايز كل شئ بقى جايز دلوقت

كنت زمان باجى وافضفض هنا حتى لما بشوف مواقف اثرت فيا بكتبها هنا اخرجها هنا عشان دية مساحتى الخاصه اعبر فيها كيفما اشاء وكيفما اريد

وبعدين بدأ الموضوع يقل شوية بشوية لما اتغيرت ظروف شغلى ووقتى انشغل اكتر وومساحه الوقت فيه بدأت تقل

حتى انشطتى الاجتماعية بدأت تقل شوية بشوية لحد ما تكاد تكون تنعدم

وللاسف كل ده بيسيب تأثير جوايا وبيتحوش شوية بشوية لحد ما تحصل حاجة الواحد يبص على اللى بيحصل هوا فيه ايه او ايه اللى حصل

حتى اغلب الناس المعتاد فى اول السنه الجديدة بينزلوا بوست

وكل واحد بيكتب تمنياته ايه وبيحاول يكون متفاءل لو تعبان من جواه ولو كويس ربنا يكرمه بقى

ويسعد ايامه

لكن حسيت انى بلاش اكون تقليدية وبدل ما انزله فى اول يوم من السنه اكتبه فى آخر يوم فى الشهر من بدايه السنه اهو تغيير بقى واكتب انطباعى عنه ايه .......حاجة من الواقع زى ما بيقولوا

وللاسف اول يوم ده كان مأساه عندى فى الشغل الناس بقت غريبه والتسامح والتراحم بقى بين الناس وبعضها بقى ضعيف جداااااا للاسف وده شئ بيضايق

عشان كدة الناس بقت اعصابها تعبانه لاقل حاجة واتفه حاجة

ضغوط الحياة بقت كتيرة وبقى عبء عليهم

يا ترى يومهم هيعملوا ايه فيه

حتى الناس بقت حياتها صعبه

فى مرة من المرات واقفه عند محل الصبح بشترى قلم للكتابه وفيه اطفال كتير واقفين عند المحل ومستينه الاطفال الصغيرين يخلصوا وادخل انا بعدهم وخصوصا ان الست اللى واقفه فى المحل ست كبيرة اوى من دور جدتى

المهم بنت شاكلها من المدارس اللغات اللى عند مكان شغلى اللى حواليا ووالدتها وياها وبتشترى حاجات كتير وكدة شيبسى وشيكولاته وكانز

واطفال تانيه جنبها

فى حين ان كان فيه بنت واقفه على الطرف ماسكه ربع جنيه فى ايديها وعماله تبصله وتبص للحاجات اللى بتطلع

وبتسال نفسها يا ترى ده هشترى بيه ايه

فضلت تسال الست ده بكام وده بكام لحد ما جابت الحاجة اللى تناسب الفلوس اللى وياها

ياااااااااه لسه الربع جنيه بيجب حاجة

والله لسه الدنيا بخير

طبعا دية حاله الله اعلم فيه منها كام حاله

والبنت دية حياتها عايشه ازاى اصلا

طبعا شئ موسف للغايه

كل يوم اعدى الصبح الاقى ست بتمد ايدها على ناصيه الشارع وتدعيلك

عشان تمد ايدك فى جيبك وتديها

لكن انا بمشى لأنى مش مقتنعه باللى بتعمله ومفيش جوايا اى مشاعر حساها من ناحيتها حاسه انها بتمثل

بحس انها بتتصنع طبعا مجرد انك تكمل مشيك وتدى ضهرك خلاص الدعوة تتقلب

هاههههههههههههههه

عالم غريب

وللاسف الاطفال بقوا منتشرين اوى فى الحكايات دية حتى جوا عربيات المترو

شئ بقى مؤسف للغاية

فى حين ان ست دخلت عندى فى مقر عملى وعنيها زايغه وزى ما تكون مكسوفة تقول حاجة او تسال على حاجة وقفت فى النص وحواليها المكاتب سالتها محتاجه حاجة او تسالى على حاجة قالتلى سلامتك

وقالت بكسوف عن طلبها كانت جايه تقبض معاشها وللاسف معاشها لسه منزلش

ومش معاها مواصلات

محتاجه مجرد جنيه عشان تركب

وبجد كانت اول واحدة اشوف ست بتطلب على استحياء كدة حتى فى ردها

بطيبه وسذاجه

وسئلت نفسى بعد ما مشيت يا ترى ممكن بقى لما تلاقى الناس اتعاطفت وياها

تستغل الفرصة وتبقى زى غيرها

شئ غريب

لو فكرنا فى افكارنا من جوانا هنحس ان مبقاش فيه امان

حتى فى اقرب الناس ليك اللى كانوا بالنسبه ليك كل حاجة وانت بالنسبه ليهم كل حاجة

من كتر الثقه المتبادله لما بيحصل دروب بتبقى من جواك زى ما تكون فيه ضلع انكسر جواك وبقول ضلع من متانه العلاقه

لما اللى قدامك بيقول كلام مكنتش تتوقعه او متحسش انه يكون من جواه كدة

تخاف من جواك

وتخاف اكتر واكتر

وتخاف من بكرة وتخاف من كل حاجة

حتى اليوم اللى بستناه بفارغ الصبر عشان بعده يكون اجازة بقيت اخاف منه

وللاسف عشان تحاول تصلح الانكسار بتحاول تلحمه عشان ترجعه تانى بتحاول من جواك وانت بتبكى ومش عارف تعمل ايه

سايب الاحوال والامور لربنا وسايبها للايام يمكن تداويها

بيكون نفسك تقول كلام كتير حلو من جواك حاسس بيه

بس مش عارف تقوله زى الاول

مبقتش عارف تتكلم او تعبر

حاجو بترجعك وتفكرك بمواقف وحاجات قبل كدة وكلام متحبش تفتكره ومواقف

واقول يا ربى كان علينا بايه ده كله

وليه الانسان بيحب يعذب نفسه بحاجات قديمه فاتت وعدت ومن وجهه نظره بيبصلها من غير ما يشوف وجهه نظر اللى حواليه

ليه بقينا سهل نظلم بعضنا ونجرح بعضنا

ليييييييييييييييييييييييييييييييه

ميت علامه استفهام

الدنيا بقى فيها ضغوط كفايه ليه منكونش بنصبر نفسنا عليها ونعين بعضنا عليها

ويمكن الصورة اللى بتكون فى ذهن الناس التانية مش عارفه اعبر عنها انها غلط لأنها فعلا غلط وعكسها تماما

بس عشان احنا من جوانا النفس بتقول ليه منقارنش واشمعنى فلان وعلان ودخلنا فى دايرة الشيطان وسبنا نفسنا ليه يدخل ما بينا

ليه نسيبه يستغل الفرصه ويكسر حاجة حلوة جوانا بنعيش بيها وبنعيش غيرنا فيها

اصبحت مرايه فيها صورتين صورة قدام الناس تضحك ومبتسم وتسعد غيرك دايما وتشارك الناس وتعيش حياتك عادى

وصورة تانية قدام نفسك مكسور وحزين وبتحاول تخرج من حزنك بالتقرب الى الله يمكن يشد من ازمتك

شئ صعب اوى على البنى آدم

انه يكون بصورتين

ساعات اقول لنفسى لما بدايه السنه كدة اومال نهايتها تبقى ايه

استغفر الله العظيم

انا عارفه ان ده غلط والمفروض ميكونش الواحد تفكيره تشاؤمى

بس بيكون غصب عن البنى آدم

حتى تانى يوم فى السنه نزلت بوست لاغنيه شيرين

شايفها كلمتها حساسه اوى

اتنين فى مرايه واحدة بس مش عارفين يميزوا بعض

يا ترى مين فيهم؟!!!!!!!!

طبعا اللى هيقرا بدايه الفضفضة مش هيكملها عشان ميتعديش

هاهههههههههه معلش بقى

اكيد هيا حاله وهتعدى

وبكرة يبقى احسن وافضل

بس محتاجه عون ربنا معايا بجد

محتاجاه يساعدنى فى قوى نفسى

عشان كدة بقول يا رب

وقولوا كلكم معايا يا رب

عشان احنا كلنا محتاجين عون ربنا ويانا

وعشان الاحداث اللى فى حياتنا تتحسن واذا بقى متحسنتش

نحاول نتغلب عليها برضو

ما هى الحياة كدة مفهاش راحه

ولا ايه يا بلوجريييييييييييييييز

هاههههههههههههههه

وربنا قال خلق الانسان فى كبد

هيا الحياة كدة لازم نعيشها يا نكسبها يا تكسبنا

تفتكروا مين اللى هيكسب

؟؟؟؟؟؟؟؟؟؟؟؟؟؟؟؟؟؟