الرحيل

كنت جالسه هذا الصباح اقرأ فى رواية الرحيل"عبد المعنم الصاوى"

لا اخفى عليكم تركت بداخلى احساس وشعور لا استطيع الفكاك منه وخصوصا بعد ان تعلقت بهذة الرواية الرائعة لعبد المنعم الصاوى فى جزء الضحية

يااااااااه كم ابكتنى من داخلى تأثرت جدا لحالة الظلم الواقع على بعض شخصياتها ابو عوف.......تفيدة.....ابو المكارم...وجلال.... وغيرهم وغيرهم

تساءلت بداخلى ياااااه كم عانى شعبنا اهوال ومظالم وجوع وسخرة كم عانينا نحن الشعوب

اتساءل الو كنا فى مثل هذا العصر ولو افترضنا اننا رجعنا للوراء لاكثر من سعبين عاما

ترى ماذا سيكون مصير حياتنا

هل كنا نملك من الجرأة الخوض فى الجهاد والدفاع عن الحرية والاستقلال

فكرت كثيرا وتوصلت الى نتيجة لا مفر منها

اننا فى نعمه نعم نعمه نحمد الله عليها نحن الان نعيش فى امن نعيش فى هدوء لا عواصف او دبابات ولا غارات ولا قتال

فكرت اننا الان نستمتع بما قد جاهدوا اجدادنا للحصول عليه ودفعوا حياتهم ودماءهم من اجلنا

نعم من اجلنا نحن فمن حقهم علينا ان نذكرهم فى سرنا وان ندعو لهم

اواصل قراءتى فى الرحيل لم انتهى منها وعلى الرغم انى اسارع الزمن لانتهى منها لاعرف نهايتها الا انها تعيينى من داخلى

فا استريح من وقت لاخر واتركها بعيد عنى قليلا واغمض جفنى قليلا للراحة وللهدوء

وفى وسط هذا التفكير والهدوء اسمع صراخا يشق السماء

قمت مفزوعة ما هذا

انه جارنا يبدوا انه اعياه مرض السكر وهو فى غيبوبة تامة

ارتجفت من داخلى بكيت بشده

اعيانى صوت بناته وزوجته يسالوه الا يرحل عنهم

ما هذا؟ الرحيل ايضا اليس بكافى انى اعانى الرحيل فى الرواية وفى الواقع ايضا!!!!! يا لها من مصادفة غريبة

دعيت فى سرى انه يشفيه وان يطول به العمر ليستمر بين بناته وزوجته الذين ليس لهم الا سواه من بعد الله سبحانه وتعالى

تذكرت صديقتى وجارتى نعم كنا اصحاب ومازلنا كنا نلعب ونلهو وكان بيننا عيش وملح وتجمعنا ذكريات لا يمكننا الفرار منها

تألمت لحالها ولموقفها الصعب الذى الم بها وهزنى صراخها ونحيبها

يا الله كن رؤوفا بعبيدك الضعفاء

الحمد لله الله سلم وبعد ان اودعوه المستشفى بمساعدة الجيران

رجع سالما بعد عدد من الساعات

...................

ما اقصى الرحيل والفراق

اللهم كن رؤوف ورحيم بنا يا رب

ادعوكم ان تقرأوا سلسلة الساقية لعبد المنعم الصاوى

بمقدار ما فيها من معاناه وتعب لكن فيها فائدة

ناس من شبرا

سلامو عليكم

النهارده كان يوم عجيب مش عارفة حاسه ان الدنيا متكربسه وورايا حاجات كتير المفروض انى اخلصها وانتهى منها

وورق مفروض اروح اطلعه عشان يكون معايا وحاجات كدة كتيرررررة

زائد ان معرفش فيه شويه مشاكل فى الشغل الجو مبقاش زى الاول معرفش ايه اللى جرى ولا ايه اللى حصل

كمان فيه حاجات كتير شاغله دماغ الواحد يمكن بحاول اخرج نفسى منها يا اما اتقابل مع اصحابى ونفرفش شوية ولا

نتكلم ونفضفض ولا حتى اروح الساقية

المرة اللى فاتت كنت لوحدى بعد ما خلصت درس الكروشيه رحت قعدت على النيل شوية لوحدى وقعدت اسمع مزيكا

وسرحت اه والله سرحت فى حاجات كتير مفتقداها فيه حاجات الواحد ميوكنش ليه دخل فيها بس اهو لازم يتكيف

وياها ومعاها

لازم كدة والا لو مرضناش بالامر الواقع هنتعب جدااااااا

ما علينا

من شوية كنت بشتغل فى المفرش بتاع الكروشيه

فا لقيت بابا فاتح قناه وبيتفرج على فيلم تسجيلى انا سامعاه من جوا

وده حى خلوصى وهنا يسكن استاذ فلان شدنى الكلام قلت لأ ده بيتكلموا على شبرا لازم يتشاف يعنى يتكلموا علينا واحنا نطنش متجيش برضو

:)

المهم

فيلم عجينىوشدنى جدا بيتكلموا على فعلا شخصيات واقعية ومن الواقع

بس بصراحة جالى اكتئاب

بسئل نفسى هوا المفروض نهرب من واقعنا ولا نواجه ونتكيف مع الامر الواقع والروتين اللى بنكون فيه ولا ايه بالظبط

فيه سلبيات كتير فى حياتنا وفيه حاجات فى حياتنا اتغيرت

دلوقت فعلا الناس كل همها بتجرى على لقمة العيش او الشغل

مبقتش الناس تسئل على بعضها زى الاول عارفين ليه عشان الدنيا تلاهى زى ما بيقولوا وهنروح بعيد ليه انا نفسى

ساعات بكون كدة

بس بيكون غصب عنى

بس بضايق بقى جدا لما اكون مقدرة ناس اذا مسالوش ولما تيجى عليا اوقات مش بسئل مثلا او اكون مقصره يقولوا

الله ليه بقى ويكونوا مضايقين طب ما انا برضو بنآدمه

وبضايق وبيجى عليا فترات اكتئاب

ومشاكل ومشاغل فى الحياه

مثلا ابادر انا واسأل على ناس واقول معلش مش فارقة مش احنا واحد بس الظاهر الناس بتفتكر ان ده طبيعى

والمفروض انى كل مرة انا اللى اسأل واتصل بس بصراحة بتيجى عليا اوقات بمل من الدور ده انى دايما لازم انا اللى

اسال واعمل واسوى طب ليه طب ما اهو اكيد ساعات بتواجه ظروف يحب حتى يلمس من اللى قدامه انه بيقدر

مشاعره وظروفه وانه بيسئل او يسأله او لما يعرف انه فيه ظروف عنده مرض احد الوالدين يهتم بس عموما بقول

معلش مهو الدنيا تلاهى ومحدش عارف ظروف الناس ايه

المهم

الفيلم بيتكلم عن الواقع اللى عايشنه

استاذ كمال السعيد

شاعر هاوى وكان وكيل وزارة سابقا على المعاش حاليا

من سكان شبرا من قديم الازل

شبه مش بيخرج من بيته عشان حاسس ان شبرا مبقتش زى زمان وانهحاسس بغربه يدوب ممكن يروح يقعد على

القهوة شوية ساعة ما يروح يقبض المعاش بتاعه

ميس هاله

ناظرة مدرسة خاصة بتقول زمان كنت بقول انى لازم اشتغل عشان اثبت ذاتى دلوقت الشغل بقى اساسى ومهم للمساهمة

فى البيت والا اقتصاد البيت هيتأثر بقت الناس بتجرى على لقمة عيشها كل يوم بنعمل نفس الروتين طبعا كفاح

بس كل اللى الواحد يتمناه انه يشوف ولاده حاجة كويسة وناجحين فى حياتهم

محمد سمير شاب متخرج من حقوق كل يوم يقضى وقته فى سيبر للجلوس على النت عشان يكلم البنت اللى بيبها اللى اوشكت على الانتهاء عشان الظروف اللى بنعيشها بيحول يدور على شغل اول ما اتخرج راح اشتغل فى المحاماه كان راسم اهداف واحلام لنفسه كلها راحت فشنك ودلوقت بيدور على شغل وعمال يبعت سيفهات لشركات ومحدش بيعبره

بيحاول يضيع وقته مع اصحابه فى ضحك ولا فرفشة جاتله مكالمه تليفون من البينت اللى بيحبها

رد عليها بيقولها يعنى باباكى عايز اكون فى مكانته اللى بداها هوا من 25 سنه طب تيجى ازاى الجمله دية بجد اثرت فيا اوى وعموما بياثر فيا عشان فعلا فيه شباب كتير مش لاقى نفسه كل حلمه يتمنى فى وظيفة كويسه وبنت يحبها وتحبه ويبدأو حياتهم سوا بس للاسف ناس كتير ضايعين فى الموضوع ده لا لايقين ده ولا ده ولو لقوا البنت شوية وبيروح كل شئ لحاله لأن طبعا اهلها عايزين طلبات هوا مش هيكون قادر عليها ومعرفش ليه ليه دايما الاهل بينسوا ايام ما هما بدأوا دلوقت مفيش لا شفقة ولا رحمه طب ليه

فيه كمان جمله تانية هزتنى اوى ان دلوقت حياتنا بقت اللى بيتحكم فيها هيا الماده

ياااااااااااااااااه

هيا الكلمة فعلا صح

بس بجد اثرت جوايا اوى وتركت فى نفسى شعور سئ خلتنى زهقانه اكتر ما كنت زهقانه ومضايقة

طبعا كان فيه شخصيات تانية كتير بس مش عايزة اكئبكم بقى لأنكو اكيد اكتئبتوا زيى

هوا الواقع شئ اساسى فى حياتنا بس ليه احنا بنهرب منه او مش عايزين نواجهه

احنا عارفين ان كل ده حاصل فى مجتمعنا وفيه ازمات كتير بنواجها وممكن يكونوا فى اهلنا او اقاربنا ناس بتعانى منها

طب ليه بقى بنضايق يا ترى ده عادى ولا الواحد بيزودها مش عارفه

انا حتى بقالى اكتر من سنه مش بقرا جرايد عارفين ليه عشان ما احبطش

مع ان ساعات بلوم نفسى اقول طب مهو ممكن الواحد يقرا حاجة تفيد ناس تانية يساعدهم فا الواحد ميكونش مقاطع كدة فا ساعات اتجول سريعا او اشوف صفحة وظائف خاليه عشان ابقى اقول لاصحابى اللى لسه الحظ محالفهمش للوظيفة الميمونه

عموما ربنا يكرمنا يا رب كلنا

انا احلامى بسيطة جدا

نفسى ابقى مستقرة فى حياتى واشوف اصحابى اللى بحبهم جدا وهما اخواتى وبعتبيرهم عيلتى يكونوا مستقرين وكل واحد ربنا يحقق ليهم اللى بيتمنوه مش كتير على ربنا

ونبقى برضو بعض ما نتجوز كلنا ان شاء الله نكون برضو ويا بعض ونسال على بعض انشاله كل فترة مهو هتبقى فيه مشاغل ومسئوليات فى الحياة لكل واحد وكل واحدة بقى مسئولة عن جوزها وخلافه اللى هما يعنى القرود الصغيرين

هاهههههههههههههههه

يا رب يحقق لينا كل اللى نتمناه

طبعا مفيش حد عايش فى الحياة بدون مشاكل بس يا رب يلهمنا الصبر ويلهمنا الرضى والقناعة عشان القناعة والرضى كنز لا يفنى

وكمان ربنا ينجحنا فى حياتنا ويكون راضى عننا

وده اهم شئ

يا رب حقق امانينا يا رب

كن مع الله......تعاون اسلامى

السلام عليكم ورحمه الله وبركاتو

فى الاونه الاخيرة انتشرت فكرة المدونات الجماعية للاشتراك وتبادل الاراء ومزيج من الافكار لتباينها وتداول افراد آخرين بها

فكرة جميله حقا مع ان احيانا قد يكون التعاون مع افراد غير موفق

لكن اسعدنى جداااااااا انى اشتركت مؤخرا فى مدونه اسلاميه مؤخرا مع اصدقائى فى الله

اسميتها كن مع الله

فا معظمنا ان لما يكون اغلبنا قد تشدنا الحياة بلهوها ويتغيراتها التى قد تكون فى بعض الاحيان سخيفة بعض الشئ المهم فلتكن لحظة فى حياتنا نحياها فى الله

نتمنى من الله ان يوفقنا الى ما فيه الخير والصلاح والفح ويتقبل عملنا باذن الله

واشكر مقترحة الفكرة اختى الحبيه ايمان صاحبة مدونه شلال العطر

ومنفذ الفكرة محمد صاحب مدونه دموع لا يراها احد

جزاهم الله عنا كل الخير ووفقنا الى صالح الاعمال باذن الله

اللهم لك الحمد كما ينبغى لعظيم وجهك وجلال سلطانك

واليكم عنوان المدونه فلتشرفونا بزيارتها وتبادلوا الحوار فيما يطرح

سأتكرككم معها

http://4theislam.blogspot.com/

ساقية عبد المنعم الصاوى

مساء الخير عليكم انا عارفة انى واخدة غرامة تأخير وكمان مدفعتش اللى عليا

هاههههههههههههههه معلش بقى هنعمل ايه يا حضرات بس الظروف معلش

وحشتنى اوى الكتابة والفضفضة هنا كان بقالى فترة عايزة اكتبلكو حاجات كتير حاجات بتصادف قدامى ومواقف وحاجات غريبة بس عادى اهو الواحد بيتعلم فى الحياة زائد ان الواحد الفترة اللى فاتت كان بيمر بحالة قلق وقرف وزهق وملل وكل حاجة يعنى باختصار احباط بس اهو الحمد لله بحاول ابعد بعيد عن الموال ده آخد نفسى بعيد مش عايزة ده يأثر عليا

المهم كنت من كام يوم انا واخويا فى ساقية الصاوى اتفقنا نروح نحضر مسرحية حسب البرنامج اللى معانا المطبوع كنت قبل كدة قمت بزيارة للساقية انا ومنى ( اختى وصحبتى فى الشغل ) المهم اتفقنا اننا اول الشهر نروح نشترك فيها ونبقى ننظم نفسنا هنحضر ايه وكدة بالنسبة ليا مكنتش اول مرة اروح فيها الساقية بالعكس روحتها قبل كدة كتير بصراحة انا بجد مهووسة بيها ملتقى ثقافى وعلمى فوق الوصف بجد قيمة الساقية دية بجد حاجة كدة تشدك اووووووووووووووووووووى وكمان مكان تحس فيه بالراحة والامان كفاية بس القاعة اللى على النيل والممر اللى وراها بجد حاجة تحوفة زمان كانت اى حد بيدخل حفلة او زائر للساقية يقدر يقعد فيها وبتأمل النيل والمنظر نفسه الساحر اللى هناك لكن دلوقت طورها بقت اسن وبقت مقتصرة على الاعضاء فقط كنوع من تشجيع الاعضاء وخصوصا ان اشتراكها رخيص (20 ج فى السنه) عارفة اللى هيقرا ده هيقول ايه ده دية شكلها بتعمل دعاية

هاههههههههههههههههههههه

ابدا والله بس نفسى كل الناس تعرف قيمة المكان ده بجد

المهم نرجع للحوار بتاعنا كنا المفروض رايحين نحضر مسرحية بس للاسف الراجل قالنا لأ دية ميعادها مكتوب غلط المهم قلنا طب هنرجع يعنى البيت بخفى حنين ولا ايه وبعدين انا كنت زهقانة وبقالى كتير اوى مخرجتش مع اخويا عشان شغلة وسفره وكدة المهم قلنا طب نشوف فيه حفلات ايه النهارده كان فيه حفلة روك ناس كتير اوى شغالين شرا تذاكر عليها وحفة موسيقى عربية لفرقة اسمها فرقة" خان" طب ها هندخل ايه اخويا قالى لو عليا انا عايز حفلة الروك بس انتى هتبقى قاعدة مش فاهمة حاجة وهتنامى هاههههههههههههههههههههههههههههههههههههههههه تعالى من قصرها ندخل الموسيقى العربية وحجزنا ودخلنا لقينا ايه بقى القاعة ما شاء الله عليها اللهم لا حسد اغبلها فاضية اللهم الا اغلب الناس الى قاعدة اهل المشتركين فى الفرقة والكراسى اغلبها فاضية

المهم بدأت الحفلة على الرغم ان منظر الكراسى وهيا فاضية منظر يجيب احباط بس ومع ذلك الفرقة بدأت حفلتها على اكمل وجهه بجد وكان فيه ناس بدأت تدخل بعد بدأ الحفل بشوية يعنى بس مش كتير برضو بس بجد بجد فرقة فوق الوصف انا بحى الساقية عشان بتحب تساعد المواهب الشابة دية بجد وبتبيح للناس دية وللشباب انهم يعرضوا موهبتهم ومش بس للمصريين لأ وللعرب كمان كان فيه ضمن الفرقة مغنيه مغربية صوتها حلو اوى غنت لاسمهان وام كلثوم بجد صوتها رائع والمضحك ان كان فيه راجل كبير قاعد اعجب اوى بصوتها بقى عمال يقول ايوة يا نورا الله عليكى وقعد يغنيلها بصوت عالى نورا يا نورا يا نورا متفهمش الراجل حصله ايه عادى بقى

المهم وتوالت العروض بجد كنت حاسة انك بتعود لزمن الفن الجميل بالاصوات الحلوة اللى بجد موهوبة كنت بقول بينى وبين نفسى الله طب ما فى ناس صوتها حلو اوى اهو اومال اللى هرينا اغانى ومسخرة وهما اصلا كبيرهم يغنوا سورى فى حمام ويكون مقفول عليهم بالضبة والمفتاح وكل حاجة مباح ليهم ايشى شرايط وسى دى وحاجة تخلى الواحد ميغبش عن زيارة دكتور الودان عشان ينضف ودانا من اللى بنسمعه فى الشرايط والبلاوى الزرقه دية

المهم بجد كنت فرحانه اوى وكنت بسقف بحماس اوى وكنت معجبة جدا بحماس وتأدية الفرقة بروح عالية اوى بجد كانت حاجة تفرح لدرجة ان كل فقرة كنت بسجلها فيديو وقلت انزلهالكو هنا عشان تستمعتوا معايا بس للاسف بقى اخويا سافر النهارده ولضيق الوقت نسيت انسخها من عنده على السى دي معلش بقى سامحونى بس تتعوض مرة تانية باذن الله

وكمان اللى عجبنى اوى ان الساقية احياء للذوق الرفيع واعادته للناس بتعمل زى زمان احياء لحفلة ام كلثوم اول خميس من كل شهر واقامته بمسرح عرائس بجد حاجة تحووووووووووووووووووووفة بجد

زائد ان الساقية بتعمل العديد من الفنون والهوايات وانشطة كتيرة حلوة اوى يا ريت احنا الشباب ننمى زوقنا بحاجة زى كدة انا بحس ان بجد الساقية دية عبارة عن ملتقى ثقافى ترفيهى فنى للطبقة المتوسطة فيما فوق عارفين ليه

لأن حفلاتها اغلبها رخيصة وندواتها اغلبها دعوات عامة يعنى اى حد يدخلها

يعنى بجد اللى كان عجبنى فى الحفلة كمان ان كان فيه واحد وخطيبتة داخلين يحضروا حفلة الموسيقى بجد حاجة جميلة ان يكون فيه شباب بيحطوا فى برنامجهم او من ضمن امتعاهم انهم مش مجرد يخرجوا هنا وهنا لأ دول متجهين لحاجة جميلة جدااااااااااا

بجد انا بشكر كل اللى بيرعوا مشروع الساقية وبيشرفوا عليه ابتداء من استاذ محمد الصاوى ابن عبد المنعم الصاوى الى كل الشركات والهئيات والعاملين فى الساقية ويشاركون فى تطويرها

وده موقع الساقيه للى يحب يزورها على النت

http://www.culturewheel.com/

انا هسيبكم وياها بقى ;)

عــيــد ســــــــــــعيد

عيد سعيد عليكم وعلينا وعلى كل المسلمين اجمعين ان شاء الله ويا رب يعود علينا الايام بكل خير يا رب

لحظة جنان وحب ومرح حاجة على كيف كيفك:)

يااااااااااااااا سلام والواحد ساعة الصبحية كدة وهوا بيكتب لولا الواحد كان صايم كان عمل فنجان كدة على المزاج اى حاجة هاههههههههههههههههههههههههههههههه

عايزة اقولكم امبارح كان يوم بجد تحوووووووووووووووووفة تحووووووووووووووفة بكل المقاييس

امبارح اتفقت انا وايمان حبيبتى صاحبة مدونة( شلال العطر) اننا ايه نتفق نخرج فى يوم نفطر بره

طب وماله نفطر منفطرش ليه يعنى المهم اتفقنا نروح فين نروح فين رسينا فى الاخر على اركيديا اهوا منها يكون جنبنا ومنه فيه كذا مطعم لو منفعتش نادية ناخد سوسو عادى يعنى

هاههههههههههههههههههه

المهم بجد انا كنت بقالى فترة مش بالبسيطة حاسة انى مش بخرج ولا بشوف اصحابى هما اصحابى اللى معايا فى الشغل وبس المهم بما ان بقى الواحد هيوفجر ويخرج ومش اى خروجة دية خروجة مع ايمان ودية ليها معانى كبيرة جداااااااا لأن ايمان شخصية جميلة ونادرة فى الزمن الحلو اوى ده اللى احنا عايشينة زائد انى بحس وايمان بتتكلم بنوع من الشاعرية مع مزيج من الخيال مع تالق فى الحديث يعنى بجد مذيعة مية على عشرة

محدش يقولى ازاى هوا كدة وخلاص

المهم ايه خرجت واتفقنا نتقابل على اربعة ونص نزلت بدرى شوية عشان هتمشى للمحطة اللى هنركب منها مش عارفة ليه كنت حاسة ان اول بقالى كتير ممشتش فى الشارع او بمعنى اصح فى منطقتى وكمان حاسة ان كنت بشوف الناس بمعنى تانى يعنى هوا شعور حلو وخلاص

كنت عايزة اليوم ده نعمل حاجة غريبة ونعيش الحياة بقى وكدة

اينعم فضلت ملطوعة شوية على المحطة عشان ايمى اتاخرت بس مش مشكلة كنت واقفة بتفرج وبجد بقيت بلاحظ ظاهرة غريبة وخايفة لحسن تنشر

اب باين عليه محترم وبدقن كدة وشكله يليق عليه شيخ المهم واضح انه كان مستنى بنته وكدة المهم بنته جت بس للاسف هيا محجبة وبقول لللاسف عشان كانت لابسة حاجة ميصحش تلبسها والا بقى يبقى الحجاب ملوش لازمة بجد كان منظر مش حلو ومنظر مش حلو اكتر للراجل الشيخ ده

المهم الحمد لله تم بحمد الله وامره وصول الاميرة ايمان الى موقعنا طبعا كان شكلها مخضوض شوية عشان التاخير بس كان شكلها زى العسل وهيا مطقمة بجد كانت تحوفة

طبعا ايمان كالعادة فضلت تعتذر ومضايقة عشانى بس خلاص فكيينا من الحوار ده ركبنا وانطلقنا ونزلنا عند المكان المقصود

طلعنا وروحنا المطعم اللى ايمان اقترحته وبجد مكان تحوفة وعجبنى جدا قعدته طبعا احنا وصلنا قبل المغرب بمفيش حاجة بسيطة

انا كنت جايبة معايا مية احتياطى المهم الناس بصراحة بتوع المطعم لحقوان كتر خيرهم بالتمر هندى ( قال يعنى هما اللى هيدفعوا الحساب.....يلا الحمد لله بقى هاهههههههههههههههههههه

المهم شربنا ومستنين بقى الاكل

قلنا معلش ننتظر شوية

كان فيه ترابيزة جنبا كان تقريبا جايين من بدرى عشان كدة الاكل نزل اصلا قبل الفطار المهم

ببص عادى على الناحية اللى جنبا الاقى واحد قاعد وترابيزة معمرة بالطعام ونازل ايه حتتك بتتك على الاكل عايزة اقوله براحة محدش بيجرى وراك وبعدين ده مفيش دم خالص يعنى مفيش مثلا زوق يدينا اى حاجة من اللى قدامه لاخواته اللى هوا احنا نحط حاجة فى معدتنا بدل ما احنا قاعدين جعانين

وكمان تقريبا الاخ ده كان عايز يضمن نصيبه عشان بقيه الفرقة اللى معاه كانوا جم هوا بقى ايه كان فى السليم خلص وحبس بسجارة وحاجاة تمام التمام

ما علينا

المهم برضو قعدنا ايه نتكلم شوية انا وايمى وقلنا نصور فيديو بما ان طبق السلطة والبطاطس وصل اهوا نتسلى فى حاجة وكمان لازم نسجل اللحظة الحلوة دية عشان بحب احتفظ بالحاجات دية اوى عشان دية بعد كدة لما بنتفكرها بتكون زكريات جميلة اوى وكمان بيكون فه شاهد عليها سواء صور او فيديو يعنى

المهم شويتين برضو دخل واحد شكله يخض من دقنه شوية وماسك بنت فى ايده باينها مراته ولا ايه حاجة كدة ودلخو المطعم بجد برضو زى المنظر السابق شاب بدقن دقنه ايه ما شاء الله عليه

والبنت اللى وياه بجد كانت برضو لابسه حاجة غريبة... جيب وفاتحة آد كدة

ده زائد ان الفريق اللى كانوا جنبا البنت خلصت من هنا وقالت ايه تعفر بقى بسيجارة برضو حرام البنيه تعبت وكدة من الصيام شوية رجعوا كلهم فى القعدة اللى ورا وهات يا ضحك واصوات غريبة كدة حتى الناس بتوع المطعم كاناو باصين اوى

بقيت اقول هوا فيه ايه هوا ايه اللى بيحصل ولا ايه اللى جرى بقينا بتوع مظاهر وبس ولا ايه

المهم اكلنا وايمان شربت القهوة عشان بجد كان اكل حافل جدا وحلينا وقعدنا نرغى طبعا كتير ونتكلم

بس بجد كانت قعدة جميلة اوى

قلنا نروح بقى عشان منتأخرش

وقفنا شوية يا جماعة مفيش قلنا طب ننط فى اى حاجة تمشى بينا سكة الكورنيش وبعدين ننزل نتمشى شوية وخلاص

ركبنا بس بصراحة قلبنا وقع فى رجلينا

انا حسيت اننا راكبين مش عربية لأ دية كانت نفاثة بس مصلحة برضو عشان نوصل على طول اينعم كنا خايفين شوية وماسكين ايدين بعض بقى وشوية شوية هنتشاهد بس عادى يعنى

هاهههههههههههههههه

كله بيروح مع الغسيل

المهم تم بحمد الله وصولنا بس يعنى كدة خلاص يعنى لأ عديت مع ايمى الناحية تانية بعد معاناه ورفض وتقطيع هاههههه عشان مكنتش عايزة عشان هيا عايزة تطمن انى وصلت وكدة بس انا صممت فضلنا نتكلم شوية وفجأة رحت بصتلها جامد هيا اتخضت قالى فيه ايه قولتلها تيجى نشرب عصير قصب

هاهههههههههههههههههه

طبعا كان فرح انها وافقت وشربنا انا شربت سريعا جدا عشان الوقت جرى بسرعة وكمان اتاخرنا ايمان بقى شربت على مهل الراجل قالى انتى باين عليكى شايله اللوز لكن هيا لسه مع ان والله لسه مشلتهاش

هاهههههههههههههههههههههههههه

بس بجد كان يوم فطار جميل اوى اوى اوى

ربنا يكرم يا رب كل اللى بحبهم فى ربنا ويخليهم ليا يا رب ويبارك فى ايامنا كلنا وعمرنا ان شاء الله

صدعتكو كتير انا عارفة بس حسيت انى لازم احكى عن لحظة حلوة احيانا مش بتكرر الا كل حين ومين

:)

وعــــــــيـد سعـــــــــــــيد

مع الكحك والبيتى فور واللى منه

التاج........هتمرر التاج لمين؟؟

بعتذر عن التاخير معلش

بس عموما كل سنة وانتو طيبين وعيد سعيد عليكو وعلينا وعلى المسلمين اجمعين يا رب

جانى تاج جميل من صديقة واخت عزيزة عليا اوى صاحبة مدونة" يلا نحلم" وعموما انا بشكرها على اعطائى التاج لأن ده شرف كبير وكمان بدعيلها ان ربنا يوفقها فى مشوارها ويكرمها فى حياتها ان شاء الله يا رب...........

لو قالولك اختارعصر من عصور مصر عشان تعيش فيه تختار اى عصر وفى عهد اى حاكم واشمعنى؟

لو خيرونى بصراحة هختار اعيش فى الزمن والعصر القديم مش عارفة بحبه اوى من الحكايات والقصص اوالرويات اللى كانت بتذكر الفترة دية وكمان زمان كان فيه الفة بين الناس وحب اكتر من دلوقت زائد ان كان فيه معانى وقيم مش موجودة دلوقت للاسف وبالتحديد فى عهد حكم الرئيس عبد الناصر بالغرم على اعتراضى فى بعض الحاجات لكن بصراحة انا حبيت فيه حاجات كتير وكمان بحس من نظره عنيه وشخصيته قوة وهيبة بجد عمرى ما شفتها فى حد وكمان عمرى ما شفت رئيس دولة الناس كانت بتحبه بالدرجة اللى شفتها فى عيون الناس دية وكمان من كلامهم عنه كل صعيدى بالاخص فى مصر لما بيتكلم على عبد الناصر بحس انه بيتكلم عن ابوه او حد قريب منه اوى

اول اولوية فى حياتك عيلتك ولا شغلك ولا اصحابك؟

اول حاجة عيلتى طبعا وبعدين اصحابى وبعدين شغلى عشان عيلتى دول حياتى كلها واصحابى اللى هما اخواتى فى الله وشغلى اللى هوا عملى وسلاحى

ايه اكتر حاجة بتحبها فى رمضان؟

اكتر حاجة بحبها ان روحانيات رمضان اللى بتكون موجوده جوا الشهر الكريم ده ده اولا ثانيا العطاء اللى بعض الناس بتكون فيه زى الشباب اللى بيكونوا واقفين فى الشوارع عشان يفطروا اللى ملحقش الفطار فى بيته وهكذا وكمان وقوف الناس مع بعضها اللى معاه حاجة يدى للى مش معاه بجد حاجة بتكون حلوة اوى بس للاسف سرعان ما تزول

اوصف ليا اجمل فطار ممكن تفطره؟

والله مقدرش احدد حاجة محددة عشان اى فطار بيجمعنى مع الناس اللى بحبهم سواء اهلى او اصحابى بيكون فى نظرى انا اجما فطار بفطره وخصوصا لما بيكون مع الناس اللى بحبهم فى ربنا

لو انت حاكم على مجموعة من الافراد حتكون عادل؟ طب حتعمل ايه عشان تتأكد انك حاكم عادل؟

مممممممممممممممم

الموضوع ده مش بالساهل كدة حكاية انى اكون حاكم على مجموعة فى وجهة نظرى مسئولية مش هينه بس عموما لو اتحطيت فيها هحاول طبعا انى اكون عادلة بينهم وكمان ادعى ربنا دايما انه يساعدنى على ده هتاكد ازاى بقى

ممممممممم

والله مش عارفة بالظبط بس عموما احاول اجتهد وادور وأسال اذا كنت فعلا حكمت بالعدل ولا غير كدة

لأنى بشر وممكن اخطأ وممكن أظلم من غير ما اقصد

اللى بيبوظ الحكام ..نفسهم ولا الشعب ولا الحاشية المقربة؟؟

1-الحاشية المقربة لأن اغلبهم بيكون منافقين وكدابين وكمان احيانا بيفسدوا السلطة لغرض ما فى نفسهم ولشخصهم زى مثلا الملك فاروق كان بنسبة كبيرة فى افساده الحاشية المقربة ليه

2- نفسهم لأن لو عند الشخص ارادة وتحكم فى ذاته مكنش قدر يخلى العوامل الخارجية دية زى الحاشية المقربين ليه او غيره انهم يسيطروا عليهم ويخوه فاسد

3- الشعب برضو بيساهم بنسبة كبيرة فى تمادى الحاكم فى بوظانه وفساده لسبب بسيط لأن بيخضع وبيسكت وبيقول خلينا جنب الحيط وده بيخلى الدنيا تبوظ اكتر واكتر ومش بنفوق الا على كارثة او بقى فجور الحاكم نفسه وبرضو عندى مثال على كدة بس مش عايزة اقوله

:)

مين اكتر اعلامى مصرى بتحترمه؟؟

والله فيه كتير من الاعلامين المصريين محترمين

زى عمرو الليثى وحمدى قنديل ومفيد فوزى وفاورق شوشة وعمر بطيشة وآمال فهمى وغيرهم وغيرهم

قريت ديوان عمر مصطفى صاحب بلوج تجربة" اسباب وجيهة للفرح" عن دار ملامح ولا لسه؟؟

بصراحة لأ:(

لو ممكن تشتغل شغلانة تانية غير اللى انت بتشتغلها او كنت بتشتغلها كنت تتمنى تبقى ايه؟؟

ممممممممممم

كنت اتمنى اشتغل فى مجال الأدب مع انه بعيد عن مجالى الوظيفى حاليا بس كنت اتمنى انى اكون فيه بس عادى يعنى كله خير وكله كويس

;D

ايه تانى بلد تتمنى تعيش فيها بعد مصر؟؟

مصربرضو

اوصف ليا ترتيبات اجمل فرح ممكن تحضره؟؟

اجمل فرح بجد بحبه اوى واتمنى انى انفذ الفكرة دية يكون فى جنينه مفتوحة ويكون الصبح وتكون الدنيا من حوالينا خضرة ومليانه ورد وتكون الترابيزات قدامنا مفروشة كلها بابيض وتكون طبعا معمرة بالطعام عشان المعازيم ميضربوناش :) وكمان تبقى فيه مزيكا هادية محيطة بالمكان وعلى فكرة بقى فيه ناس بتنفذه دلوقت فى مصر بس احنا اللى بنحب الحاجات المعتادة

بتراعى كلام الناس والقيل والقال؟ لو اه او لو لا قولى ليه؟

بصراحة احيانا اه براعيه وساعات تانية مش بيهمنى عشان بكون واثقة من نفسى دية حاجة وكمان لو قعدت بقى اعمل حساب كل كلمة ليهم مش هخلص مدام الحاجة دية مفهاش اى عيب او شبهه او اى حاجة يبقى خلاص

صحيت من النوم مالقيتش الموبايل ولا الكمبيوتر ولا الكاميرا الديجيتال ولقيتنا رجعنا لعصر الحمام الزاجل والحصنة حتبقى سعيد؟

طب يا ريت حتى الواحد يرتاح شوية من الرن كل شوية وحتى كمان الكمبيوتر قرب يبوظ عنينا من الاشعاعات بتاعته دية

هاهههههههههههههه

السعادة هى؟؟

هى ان تجد من يحبك بصدق وان تكون محبوبا من كل من هم حولك

وان تكون راضى ومطئمن البال دائما

عندك امل ؟ اسبابك ؟

لازم يكون عندى أمل حتى لو كل حاجة من حواليا بتقول لأ عشان اعرف اعيش والا بقى هموت من الغم والاكتئاب

لما تحب تهرب من كل شىء بتروح فين؟؟

بصراحة المكان اللى بروح ليه على طول لما اكون مضايقة اوى او اى سبب ايا كان هوا النيل وبالاخص فوق كوبرى مش عارفة اسمه ايه بس مش قصر النيل عشان عارفة ان اغلب الناس بتفتكره هوا لكن لأ بس بجد بحب منظر النيل من عليه اوى اوى وكمان منظر الناس اللى بتكون ساكناه تحت بجد بنسى اى حاجة بتكون مضايقة منها وكمان بحس ان العملية معايا بتهون شوية بشوية وبرتاح اوى

امتى اول مرة اخدت فيها نفس طويل كده وقلت بينك وبين نفسك ياااااه انا فعلا كبرت؟؟

لما بكون موضوعة فى حيز المسئولية ومطلوب منى الحاجة دية او اللى قدامى رامى عليا امل وحمل ومنتظر منى نتيجة معينه فا بحس ساعتها انى كبرت

لما بتعمل عمل خيرى بيكون ايه هو دافعك الاول؟؟

اولا ابتغاء وجه الله

ثانيا:العطاء طبعا لسبب بسيط ان كل واحد جواه طاقة وزى ما احنا بنحتاج لناس معينه فيه غيرنا محتاجين لينا ومحتاجين لعطائنا

بتشرب سجاير؟لو الاجابة اه ايه شعورك لو شفت ست بتشرب سجاير وليه؟

اهو ده اللى ناقص كمان هاههههههههههههههههه لأ طبعا والحمد لله ان ربنا حامينا من ده ووبصراحة لما بشوف ست بتشرب مش عارفة ليه بتقل من نظرى اوى

بتعرف ايدك اليمين من الشمال ازاى؟

ايديا اليمين اللى بعمل بيها اغلب الحاجات بساعد بيها بدى بيها باكل بيها وده اللى اتربيت عليه عشان كدة بعرف افرق واعرف اليمين من الشمال

ايه اكتر اله موسيقية بتحبها؟

البيانو

فى رأيك ليه الذوق والنخوة اتعدموا؟

عشان المعايير والثقافة الخاصة بشعبنا والناس اتغيرت خلاص فا عشان كدة اترتب عليها تغير الزوق والنخوة وكل حاجة بقى

ايه الحاجة اللى لو حصلتلك تبقى سعيد قوى؟

ان ربنا يوفقنى فى حياتى ومستقبلى وكمان ربنا يجمعنى بالشخص اللى بتمناه وبحبه واكون خير الزوجة الصالحة ليه وهوا كمان يكون خير الزوج الصالح لى

تختار يبقى عندك ارض زراعية ولا اجنص عربيات ولا كام عمارة ولا فلوس فى البنك؟

ارض زراعية وفلوس بالمعقول دول لوحدهم كفيلة انهم يخلوا الواحد مستور وكمان عايش كويس ويحقق اى حاجة هوا عايزها

البحر ولا النيل؟؟؟

النيل

مركب ولا طيارة؟

مركب

عاقل ولا مجنون؟

والله ساعات بكون كدة وساعات بعيش احلى لحظات الجنون بعنيها عادى يعنى لازم الواحد يعيش حياته برضو

تقرا كتاب ولا تتفرج على فيلم؟

والله الاغلبية اقرا كتاب بس مفيش مشكلة لو كنوع من التنويع انى اتفرج على فيلم لقتل الروتين بس

بتمرر التاج لمين؟؟!!!!

شلال العطر...عبدو محتاس.....قطة الصحراء.....جهينه......سحابة........وردايا.........خواطر فتاه(ايمان الطاهر)

حياة الاحلام........سوكا

وكل سنة وانتو طيبين وعيد سعيد يا رب

:)